Emri i saj u përfol deri në minutat e fundit mbrëmjen e djeshme si kandidate potenciale e listës së grupit “Alibeaj” për bashkinë e Tiranës, por pedagogia Jonila Godole duket se nuk beson te formacioni në fjalë.
Sa i përket kandidimit të saj përballë Veliajt dhe Këlliçit, ajo nuk e mohoi që ishte opsion në tryezë, duke zbuluar në emisionin “DEBAT” se ishte vetë kandidati Roland Bejko ai që propozoi emrin e saj për këtë garë.
Më tej ajo shtoi se kur u votua në këtë mbledhje nuk ishte e pranishme.
“Ishte zoti Bejko që më propozoi. Unë nuk thashë as po as jo thjesht e lashë të rridhte dhe doja ta testoja. Dhe doja të testoja dhe tezën që një njeri që vjen nga jashtë ka sukses në këto struktura. Unë edhe pse e mora me shaka, e krijova një grup me ekspertë që kishin idetë dhe jam e lumtur që njerëz të tillë të jenë këtu për platforma”, zbuloi ajo.
Godole ka folur në lidhje me kandidaturat e këtij grupimi që do hyjë në garë vetëm në 20 bashki për zgjedhjet lokale të 16 majit.
Ajo shprehu mosdakordësinë e saj për këtë vendim të Alibeajt duke u shprehur se do kishte dashur që të ishin 61 emra, ose përndryshe nuk kishte arsye se përse të mbahej vula nga ata dhe t’i çohej PD së Berishës që ka mbështetjen më të madhe të demokratëve.
“Unë personalisht do kisha dashur 61 kandidatë. Kjo është edhe ajo që kam mbrojtur gjatë javës që shkuar, që kemi pasur debate. Deri tani janë 20, jo 16. Të shpresojmë që do avancojë akoma. Natyrisht që nuk është ajo që pritej nga Partia Demokratike. Aty pashë që pjesa më e madhe e tyre prej kohësh kishin kërkuar kandidimin në 61 bashki, pra me 61 kandidatë. Ajo që vura re ishte se një pjesë e lidershipit nuk ishin dakord me këtë gjë.
Në çastin që partia nuk është përgatitur për “luftë” le të themi, për zgjedhje pra, atëherë nuk është e ndershme që të mbahet vula për të cilën u luftua kaq shumë. Dhe unë i kam thënë këtë fjali: Merreni këtë vulë, shkriheni Partinë Demokratike zyrtare, çojini aty ku siç duket mbase janë shumica e demokratëve”, deklaroi ajo.
