Këshilli Shqiptar i Medias ka reaguar pas sulmit me armë zjarri ndaj godinës së Top Channel, që shkaktoi vdekjen e rojës Pal Kola.
KSHM shprehet se sulmi mbi Top Channel është sulm mbi të gjithë median.
“Kshm dënon me forcë sulmin ndaj TCH ku mbeti i vrarë roja i sigurisë i ndërtesës. Ky sulm i paprecedentë tregon edhe një herë për pozicionin e vështirë të mediave në Shqipëri, ku siguria e tyre nuk është e garantuar dhe ku krimi merr kurajon të godasë deri dhe një nga mediat më të mëdha në vend. Sulmi ndaj TCH nuk është sulm vetëm kundër një medie, po kundër gjithë medias, madje dhe kundër publikut që e ndjek atë media”, thuhet në një reagim të këshillit.
KSHM i kërkon organeve të rendit të zbardhin sa më shpejt rastin e të vënë agresorët para përgjegjësisë ligjore, dhe njëkohësisht fton edhe mediat e tjera në vend të solidarizohen me qëllim për t’i dhënë një mesazh sa më të fortë krimit.
