Opozita ka ndezur motorët e fushatës për zgjedhjet lokale të 14 Majit dhe beteja më e nxehtë do të mbetet ajo mes Belind Këlliçit dhe Erion Veliajt për bashkinë e Tiranës.
Këlliçi ka zhvilluar këtë të hënë një takim me biznesin e mesëm dhe të vogël në kryeqytet, ku ka njoftuar se gjashtë taksa që “vilen” nga Bashkia e Tiranës dhe rrëndojnë barrën e biznesit e qytetarëve do të zerohen ose përgjysmohen.
“Biznesi i vogël e i mesëm e ka mbajtur gjallë Tiranën”, ishte fjali me të cilën kandidati i koalicionit “Bashkë Fitojmë” nisi takimin, duke iu drejtuar më pas të pranishmëve me këto fjalë: “Mundi dhe përpjekja juaj krijojnë vende pune”.
“Nuk krijojnë vende pune fasadat e shfaqjet. Bashkia do jetë partneri i biznesit të vogël. Veliaj nuk ka folur asnje ditë për ju”, tha Këlliçi.
Një ndër taksat që ai ka propozuar të zerojë nëse do të zgjidhet kryebashkiak, është taksa e përkohshme për infrastrukturën arsimore.
Sipas tij, kjo taksë u ka vjelur qytetarëve 42 milionë euro që prej vitit 2016, dhe një pjesë e konsiderueshme ka përfunduar në xhepat e pushtetarëve.
Më pas, Këlliçi premtoi se do të ulë me 50% tarifën për pastrimin dhe gjelbërimin.
“Nuk e kemi parë asnjëherë mbledhjen e këshillit bashkiakë, asnjë diskutim mbi hallet e qytetarëve apo bizneseve. Bizneset janë përballur me një rritje me 10 fish të taksave. Historia e këtyre 10 viteve ka qenë histori persekutimi për 54 mijë biznese në kryeqytet. Kjo kohë do marrë fund sepse deklaroj se biznesi i vogël dhe i mesëm do jenë prioriteti im si kryebashkiak i ardhshëm. Bashkarisht do reduktojmë taksat dhe tarifat vendore, jo vetëm se kredoja jonë si forcë politike është për taksa të ulëta. Tek unë do gjeni një aleat tejet i besuar”, deklaroi kandidati opozitar.
Më tej ai nënvizoi se janë mbi 41 mijë biznese të vogla dhe të mesme që do përfitojnë nga kjo paketë reduktimesh.
“Edhe bizneset e mëdha do përfitojnë. Ulja e taksave, do të rrisë në fund të ditës të hyrat në arkën e bashkisë, sepse taksat e ulëta bëjnë që bizneset t’i paguajnë ato. Bashkia e Tiranës ka buxhet afro 240 mln euro”, deklaroi Këlliçi.
TAKSAT QË DO HIQEN DHE ULEN
- Taksa e shumëpërfolur që është taksa e përkohshme e infrastrukturës arsimore. Me Belind Këlliçin si kryetar bashkie nesër, do bëhet zero. Është antikushteteuese. U proklamua si taksë e përkohshme. U ka marrë qytetarëve tanë nga 1 janari i 2016-ës deri më siot, 42 mln euro. Me 42 mln euro pretendohet se janë bërë 17 shkolla. Në raport me çmimin dhe kostot e ndërtimit, s’ka logjikë racionale se si në BE të ndërtohet një shkollë me 600 mijë euro, ndërsa në Shqipëri me 2 mln euro. Gjykoj se pas 14 majit, kjo taksë do zërohet.
- Taksa e tokës bujqësore do të bëhet zero për pjesën që i takon bashkisë.
- Taksa e fjetjes në hotel do reduktohet me 30%.
- Taksa e tabelës informuese do reduktohet me 30%.
- Taksa e truallit do reduktohet me 30%
- Taksa mbi ndërtesën do reduktohet me 30%.
TARIFAT
- Tarifa e pastrimit dhe e gjelbërimit do reduktohet me 50%
- Tarifa e zënies së hapësirës publike do reduktohet me 50%
