Para aksidentit të ndodhur në Lezhë të Premten, është shënuar një kërcënim me armë zjarri.
Ky është konluzioni i hetimeve të prokurorisë dhe policisë së Lezhës, që kanë arrestuar një 20-vjeçar dhe kanë shpallur në kërkim tre persona të tjerë.
Kërcënimi para aksidentit
Policia njoftoi zyrtarisht këtë të Hënë se nga hetimet ka rezultuar se shtetasi A.F., në bashkëpunim me 2 shokë të tij, shtetasit K.Gj. dhe D.D. (të dy të shpallur në kërkim), kanë kanosur me armë zjarri poshtë mbikalimit të Ishull Lezhës shtetasin E.L. Gjatë largimit me shpejtësi, automjeti me të cilin udhëtonin shtetasit A.F., K.Gj. dhe D.D., është përplasur në mbikalimin e Ishull Lezhës, me automjetin me drejtues shtetasin M.K..
“Nga veprimet e para, ky rast është trajtuar fillimisht si aksident rrugor, por si rezultat i informacioneve të grumbulluara në vendngjarje, janë thelluar hetimet dhe si rezultat i tyre, është zbardhur dinamika e këtij rasti”, shtuan të njëjtat burime.
Në këto kushte blutë arrestuan A.F., 20 vjeç, banues në Lezhë, si dhe shpallën në kërkim K.Gj., 24 vjeç, banues në Rrilë dhe D D., 23 vjeç, banues në Barbullojë.
Gjithashtu, për këtë rast u shpall në kërkim E.L., 23 vjeç, banues në Tale, i cili nuk ka kallëzuar se është kanosur me armë zjarri, nga 3 shtetasit e lartpërmendur.
