Kryeministri i Kosovës, Albin Kurti do të vizitojë sot Tiranën.
Kreu i ekzekutivit do të zhvillojë takime me homologun Edi Rama dhe me kryeparlamentaren Lindita Nikolla.
Takimi Nikolla-Kurti pritet të ndodhë në selinë e Kuvendit, duke filluar nga ora 11:30.
Temë e diskutimeve në këto dy takime të Kurtit pritet të jetë marrëveshja e pafirmosur në Ohër, për të cilën ranë dakord që të zbatohet si Kosova edhe Serbia.
Në marrëveshjen e arritur në Ohër, palët kanë rënë dakord të zbatojnë marrëveshjet e arritura mes tyre, si dhe Kosova të nisë përgatitjet për të siguruar një nivel të mirëfilltë të vetëmenaxhimit të komunitetit serb, një nen që shihet si referencë për Asociacionin e komunave me shumicë serbe.
Një tjetër dakordësi është arritur edhe për personat e zhdukur gjatë luftës, ndërsa për monitorimin e të gjitha pikave të aneksit të marrëveshjes do të ngrihet një Komitet i Përbashkët Monitorues që do të kryesohet nga BE-ja.
Edhe pse nuk është firmosur, palët pas 12 orësh bisedime në Ohër arritën marrëveshje për të zbatuar propozimin e BE për normalizimin e marrëdhënieve.
