Grupi “Alibeaj” pasi mori nga KAS të drejtën për t’u regjistruar në zgjedhjet lokale të 14 majit me logon e Partisë Demokratike, duket se po përjeton një krizë të brendshme, teksa vendimi për të hyrë me kandidatë ose jo, e ka përçarë në tre fraksione.
Ashtu siç edhe është përfolur në tre ditët e fundit, tre minigrupe brenda njësisë me 18 deputetë që ndjekin “Alibeajn” kanë hedhur në tryezë tre opsione të ndryshme për mënyrën si do të hyjnë në zgjedhje.
Mbledhja e djeshme e grupit “Alibeaj” la të pazgjidhur misterin dhe pritet që sot në mbledhjen që nis në orën 18:00, të merret vendimi final.
Pikëpyetja është nëse PD do të dalë me kandidatë për bashkitë apo vetëm për këshillat bashkiakë, pak orë para përfundimit të afatit zyrtar për dorëzimin e listave në KQZ.
Sa i përket tre grupimeve që janë kristalizuar brenda grupit, një prej tyre përbëhet nga deputetet Jorida Tabaku, Dhurata Çupi dhe Oriola Nebiaj, të cilat kërkojnë që të dalin në zgjedhjet e 14 majit vetëm me kandidatë për Këshillat Bashkiakë.
Grupi tjetër është i Gazment Bardhit dhe përfaqësuesit ligjor Indrit Sefa. Dyshja në fjalë kërkon që të dalin me kandidatë në pak zona, të cilat vlerësohet se mund të fitohen.
Grupi tjetër që përbën edhe shumicën drejtohet nga Enkelejd Alibeaj dhe kërkojnë që të dalin patjetër me kandidatët e tyre në të gjithë vendin.
Sipas tyre kandidatë duhet të mos ketë vetëm në zonat ku vlerësohet se fitojnë kandidatët e Primareve.
Mësohet se pas shume diskutimeve, pas mesnatës është votuar për secilin nga tre variantet dhe ai i propozuar nga Alibeaj ka marrë më shumë vota pro.
Sa i përket variantit të parë, për të kandiduar vetëm për këshillat bashkiak, Kryesia e Grupit të Alibeajt ka votuar kundër, me rreth 15 vota kundër.
Varianti i dytë, ku të kandidohej për këshillat bashkiak dhe në bashki specifike, ku kishte kandidatë fitues, u votua gjithashtu kundër.
Ndërsa varianti i tretë, ku do të kandidohej për Tiranën, Durrësin, Elbasanin dhe bashkitë e tjera, u votua me shumicë. Por pavarësisht këtij votimi, grupi “Alibeaj” duket se do ta lërë në dorë të degëve vendimin për të hyrë në zgjedhje me 61 kandidatë.
Degët e PD-së së vulës në rrethe do të vendosin nëse duan kandidatë në zgjedhje ose jo, ndaj mbetet me kuriozitet të shihet vendimi final.
Ndërkohë një detaj tepër i rëndësishëm nga mbledhja është fakti se grupi i ka kërkuar deputetes Jorida Tabaku që të kandidojë për bashkinë e Tiranës përballë Erion Veliajt, Belind Këlliçit dhe Arlind Qorrit.
Emrat e propozuar në mbledhje si kandidatë të mundshëm për Tiranën ishin Jorida Tabaku, pedagodia Jonila Godole, ish-kryetari i PD në Gjirokastër Roland Bejko dhe ish-deputeti i Dibrës, Xhemal Gjunkshi.
Tabaku e ka refuzuar propozimin duke argumentuar se nuk do të përçajë PD-në dhe mësohet se të njëjtën gjë bëri edhe Xhemal Gjunkshi.
17 kandidatët e propozuar nga Alibeaj deri më tani:
Mallakastër- Agron Kapllanaj
Poliçan – Florian Qamo
Kuçovë – Ilirjan Koxhaj
Kamëz – Bilbil Bajraktari
Lezhë – Sandër Marku
Krujë – Sabah Sheta
Dibër – Naim Gazidede
Kurbin- Genc Doçi
Dimal- Dritan Sula
Patos- Pranvera Rizai
Vaut i Dejës- Klomentina Drini
Fier -Eriselda Zotaj Çelaj
Librazhd -Bujar Vreto
Vorë- Ibrahim Bruka
Korçë -Gjergji Gjata
Sarandë- Skënder Muço
Mirditë- Mark Ruçi
