Banorët e Bërxullës kanë dalë të këtë djelë sërish në aksin që lidh Qafë-Kasharin me Rinasin për të protestuar kundër ndërtimit të autostradës Thumanë-Kashar, gjurma e së cilës është projektuar të kalojë mbi banesat e tyre.
Fakti që enden prej disa kohësh nëpër dyert e institucioneve pa gjetur një zgjidhje për dëmshpërblimin e duhur, ka bërë që banorët e Bërxullës të humbasin besimin, aq sa një prej tyre ka kërcënuar me vetëflijim.
Teksa televizionet transmetonin live protestën një banor u shfaq me shishen e benzinës në dorë duke paralajmëruar aktin e vetëflijimit, në rast se qeveria nuk tërhiqet nga projekti që shkatërron pronat e tyre.
Ai u shpreh për gazetarët se sot është tërhequr nga ky vendim pas i ka dhënë besën dy vajzave të tij që jetojnë jashtë vendit, dhe nënvizoi se është krim të vrasësh veten për këta qeveritarë.
“Rracë më të poshtër nuk ka. Ky është ai që vret. Ky të merr pronën. Nuk lë gjë pa bërë. Zoti e ka bërë këtë muaj. Por këto nuk duan asgjë. Ky popull është i gjithi në agjërim përveç atyre që janë sëmurë. Shtetit po ia numërojnë përditë për këtë masakër që bën. Ku është prokuroria, gjykata, SPAK-u?! Tallen atje në karrige. Radhën tjetër thashë do flijoj veten. Sot nuk e bëj. I kam dhënë besën vajzave të mia në Itali. Është krim të vrasësh veten për këta. Por të detyrojnë duke u tallur me popullin. Nuk është dhënë as dëmshpërblimi i asaj rruge”, tha ai.
Ndërkohë, shishja e benzinës që mbante në dorë i është rrëmbyer me shpejtësi nga një efektiv policie, në momentin që e tregoi nga kamerat.
Kjo e revoltoi më tepër protestuesin, i cili u shpreh se “nuk k eçe do jetën” kur shteti bën masakër dhe nuk u thotë banorëve që humbasin gjithçka kanë ndërtuar, që të ulen të gjejnë një zgjidhje për çështjen.
“Të kesh turpin më të madh. Ja vëllezër shikoni se çfarë bëhet. Të bësh masakër, nuk ke çe do jetën. Nuk thotë kush hajde flasim. Nuk ka më keq më. O vëllezër o motra le të na vrasin. Ne do ta ndjekim rrugën tonë ligjore. Do i drejtohemi Strasburgut”, u shpreh ai.
