Mbetja pa pallat sporti në një prej momenteve kyçe të sezonit, ku dhe do të ndahen vendet e “play off”-it, e ka vendosur në vështirësi të jashtëzakonshme Teutën e basketbollit të meshkujve.
Kërkesa e durrsakëve për ta shtyrë ndeshjen kundër Besëlidhjes, nuk është pranuar nga lezhjanët. Presidenti i Teutës, Arqile Gorea, akuzon FSHB-në, ndërsa të gjithë këtë e quan një skenar dhe atentat që po i bëhet ekipit të tij që të mos dalë kampion.
Në një prononcim për “Panorama Sport”, Gorea shprehet kështu për situatën e krijuar:
“Ne nuk kemi kërkuar shtyrje të ndeshjes se kishim nevoja si ekip, por kërkesa jonë erdhi si rezultat i një ndërhyrjeje qeveritare për organizimin e Kampionatit Botëror të Peshëngritjes. Federata në raste të tilla e ka për detyrë, e para të na mbrojë dhe e dyta, siç thuhet, në rregullore që në raste të jashtëzakonshme si rasti në fjalë, të gjejë zgjidhje. Kjo është kompetencë e federatës dhe për aq kohë sa nuk kemi zgjidhje, unë me plot gojën kam të drejtë të akuzoj që ky është një skenar. Është një atentat që i bëhet Teutës për të mos marrë titullin. E përsëris, ne jemi në një situatë të jashtëzakonshme, pasi ka ndërhyrë qeveria dhe nuk është kërkesë jona si klub. Përderisa jemi në një situatë të jashtëzakonshme, i takon federatës që të vendosë, ndryshe unë kam të gjithë të drejtën që të them se kjo është planifikuar si strategji kundër Teutës. Një atentat që u bëhet sukseseve tona, për të mos e marrë kampionatin”, deklaron fillimisht presidenti i kampionëve në fuqi të Shqipërisë në basketboll.
Më tej Gorea flet për kërkesën e bërë ndaj Besëlidhjes dhe ndërhyrjet sipas tij të lezhjanëve në federatë:
“Ne kemi bërë kërkesë për ta shtyrë, ashtu sikurse edhe ne ia kemi shtyrë në një rast ndeshjen Besëlidhjes pas kërkesës së tyre. Kështu që në kuadrin e kësaj marrëveshjeje u themi që të na e spostojnë edhe ata takimin. Data 3 që kemi kërkuar ne është 6 ditë para ‘play off’-it, kështu që nuk ka asnjë problem. Por me sa duket ata janë tmerruar nga rezultati me Tiranën dhe këtu është i gjithë problemi. Por kampionati nuk merret me ndërhyrjet e Avni Ponarit. Janë bërë dy oficerë, njëri te peshëngritja dhe tjetri te basketbolli, që po bëjnë çorap sportin shqiptar”, deklaron Gorea.
Në fund presidenti i Teutës thotë se ishin në bisedime për sallën e Kamzës, por sipas tij iu mbyllën dyert me ndërhyrje të sekretarit të FSHB-së, Korab Llazani:
“Ne hymë në tratativa me Kamzën dhe në fillim na thanë që mund të shkonim për të bërë stërvitje, ndërsa më pas na i mbyllën dyert duke na thënë se kështu kemi marrë urdhër nga Korab Llazani”, përfundon Gorea.
