Banorët e Bërxullës që preken nga projekti i aksit Thumanë Kashar, edhe këtë të dielë kanë dalë sërish në protestë duke bllokuar rrugën e Rinasit.
Prej 6 muajsh protestojnë për çështjen e shpronësimit, ndërsa ditën e sotme ata kanë paralajmëruar se protestat e tyre do të përshkallëzohen dhe në vazhdim do të qëndrojnë deri në 48 orë në rrugë.
Një prej banorëve shprehet se nga projekti që parashikohet në këtë zonë bllokohen 100 mijë banorë ndërsa i kërkon qeverisë të marrë masa.
“Do rrimë deri në 48 orë pa lëvizur nga rruga. Do ta bllokojmë rrugën. Rrugë alternative i kanë. Shteti ka bllokuar BERZH-in për të dëmshpërblyer pronat.
Duhet të dini një gjë. Kjo rrugë që shikoni ju, bllokohen 100 mijë banorë. Këtu po bëhet një masakër. Nuk ka qeveri ta marrë vesh. Është zhvilluar nga studio e Italisë pa e parë askush në terren.
Të paktën një dron të kishin ngritur për ta studiuar. Kjo rrugë as Shqipërisë nuk i shërben. I shërben botës dhe Europës që duan të kalojnë. Bota të gjejë zgjidhje. Ambasada amerikane i ka parë. Janë në dijeni të protestës sonë prej 6 muajsh dhe asnjë nuk merr kurajon”, shprehet banori.
