Personazhi i njohur i rrjeteve sociale, Aleks Vishaj, së bashku me një grup të rinjsh kanë mbërritur jashtë shtëpisë së “Big Brother VIP Albania” dhe po brohorasin në mbështetje të Luizit.
Ata po protestojnë kundër produksionit të “BBV” pas ndodhive të fundit me Instagramit e Luizit dhe nominim e sotëm ku Kiara rrezikon të eliminohet nga shtëpia. Luizi ka paralajmëruar disa herë se nëse Kiara eliminohet edhe ai do të lërë shtëpinë.
Ndërkohë që protesta erdhi pa paralajmërim, banorët arritën të dëgjojnë brohorimat dhe thirrjet, por produksioni reagoi shumë shpejt duke i mbyllur brenda banorët dhe duke vendosur muzikë me volum të lartë.
Kunati i Luiz Ejllit, Sokol Tahiri, ka sqaruar pak ditë më parë të gjithë fansat e këngëtarit se çfarë po ndodh me faqen zyrtare të Instagramit të Luizit dhe gjithë thashethemet për një kontratë me produksionin e BBV.
Arsyeja se pse emri i faqes është vënë në emër të motrës së këngëtarit dhe fshirja e të gjitha postimeve ëshë për shkak se të drejtat në lidhje me emrin dhe administrimin e Luizit i kanë kaluar Top Channel.
Kunati i këngëtarit shkodran hodhi dyshime mbi formën dhe aktin juridik me të cilin të drejtat e Luizit i kanë kaluar Top Channel. Ai shprehet se roli dhe qëllimi i gjithë kësaj do të sqarohet në fund, kur Luizi të dalë dhe të kuptojë si qëndron gjithë e vërteta.
