Deputeti i Partisë Demokratike, Oerd Bylykbashi dhe Sekretari për Çështjet Zgjedhore në këtë forcë politike, Ivi Kaso janë paraqitur në SPAK për të depozituar një kallëzim për aplikacionin “Aktivisti”.
Bylykbashi, në një deklaratë për mediat, tha se kallëzimi përfshin kryeministrin Edi Rama dhe zyrtarë të tjerë, ndërsa i bëri thirrje SPAK që të veprojë me forcë. Ndër të tjera, ai shtoi se ky aplikacion duhet të ndalet menjëherë pasi cenon sekretin dhe lirinë e votës.
Bylykbashi tha se kallëzimi nuk është pranuar duke kërkuar që të dorëzohet me postë. Ai tha se ata do bëjnë të pamundurën për të dorëzuar këllëzimin ndërsa shtoi se e gjithë administrata është në një presion kriminal.
“Ky kallëzim dorëzohet sot patjetër për të gjithë zyrtarët e lartë, duke filluar nga kryeministri që ka konsumuar vepra të rënda penale. I gjithë kapitulli për krimet zgjedhore. Ne do ta çojmë përpara këtë kallëzim.
Kërkojmë nga SPAK të veprojë me forcë nuk mund të tërhiqet zvarrë një cështje e tillë. Është cënuar sekreti dhe liria e votës. E tërë administratë është në një presion kriminal për të ndikuar në votë.”- tha ai.
