Një aksident ka ndodhur në Lezhë mbrëmjen e kësaj të Premteje, ndërsa dyshohet se ka pasur dhe të shtëna me armë zjarri.
Burime policore bëjnë me dije se dy automjete janë përfshirë në një aksident rrugor, në superstradën Lezhë-Milot, pranë Ishull Lezhës. Nga aksidenti nuk ka persona të lënduar, por vetëm dëme materiale.
Sipas të njëjtave burime, në të dyja automjetet udhëtonin disa persona, ndërsa ka pasur dëshmi që para përplasjes ata janë konfliktuar si dhe është qëlluar me armë zjarri. Megjithatë, deri më tani, nuk rezulton të jenë gjetur gëzhoja në vendngjarje nga policia, ndërsa dëshmitë po verifikohen. Personat në bord të dy automjeteve po ashtu mësohet të kenë mohuar përplasjen mes tyre.
Zyrtarisht, policia njoftoi se “rreth orës 16:20, në aksin rrugor Tiranë-Lezhë, në Ishull Lezhë, janë aksidentuar automjeti tip “Audi A6” me drejtues shtetasin M. K., 36 vjeç, banues në Lezhë me automjetin tip “Audi Q5″me drejtues shtetasin K. Gj., 24 vjeç, banues në Lezhë, me pasoja vetëm dëme materiale”.
“Shërbimet e Policisë Rrugore po kryejnë veprimet administrative për trajtimin e ngjarjes rrugore si aksident me dëme materiale, ndërsa të dy drejtuesit e automjeteve së bashku me pasagjerët në këto automjete ndodhen të shoqëruar në ambientet e Komisariatit të Policisë Lezhë për sqarimin e plotë të rrethanave të aksidentit”, shtuan të njëjtat burime.
