Lëndët narkotike kanë gjetur një përdorim të gjerë tashmë edhe në ambjentet e shkollave të mesme, ku konsumatorë janë të miturit nga mosha 12 deri ne 17 vjecc.
Në një prononcim për mediat dy nxënës të shkollës “Petro Nini Luarasi”, kanë treguar më tepër detaje rreth konsumimit dhe mënyrave të shpërndarjes së lëndëve narkotike.
“Gjimnazist jam dhe unë, në vitin e tretë. Nuk jam përdorues i fortë, por për qef. Kur mblidhemi për ditëlindje. Nuk jemi përdorues të varur nga droga. Me shokët, hajde pije. Hamë bukë.Të bën të hash bukë shumë. Para një viti, 16 vjeç e kam konsumuar për herë të parë. Të lezeton, të heq streset. E ke mendjen për të qeshur, jo për të mbajtur mendjen tek stresi. Ka, është hashashi.” – u shpreh ai.
Shoku tjetër, tregon se drogën e mësoi në lagje, poshtë pallateve apo në rrugicat pa ndriçim. Kurse në shkollë shumë shokë e shoqe të tij e marrin normalisht, kryesisht kanabis.
“18 vjeç, prej një viti. E nisa nëpërmjet shokëve, në lagje. Në çdo cep konsumohet. Kanabis. Është për të rinjtë. Është qetësuese. Rinia ka strese. Është dhe pjesë qejfi. Nuk është se është e domosdoshme. Me raste për qejf. 2-3 herë në javë. Nuk e kalojmë cakun. Është e lehtë me e gjet. Në çdo cep. E dallon. Kush e pi e di. I shohin dhe vetë ato që e shesin tha njëri prej tyre.”- tha një adoleshent tjetër.
Kujtojmë se një ditë më parë policia goditi dy banda droge, me strukturë shpërndarësish në shkolla dhe lokale nate të Tiranës. 20 persona të moshave të ndryshme u arrestuan, 4 janë shpallur në kërkim, mes tyre 3 vajza.
