Sezonin e kaluar drejtoi për disa javë Dinamon në Shqipëri, por pa mundur që ta shpëtonte këtë skuadër prej rënies nga Superiorja. Rodolfo Vanoli tashmë ka marrë një post të rëndësishëm te klubi i Serisë A, Salernitana.
Ish-trajneri i bluve është emëruar përgjegjës teknik i skuadrës së parë të Salernitanës dhe njëkohësisht do të stërvitë edhe të rinjtë e saj. Lajmi bëhet i ditur nga agjenti i trajnerit italian, vlonjati Altin Selmanaj.
Përveç eksperiencës që ka pasur në Shqipëri dhe Slloveni, Vanoli ka qenë edhe më parë në role drejtues në Itali dhe konkretisht tek Udineze. Tani bëhet pjesë e Salernitanës dhe ndoshta në një të ardhme të afërt mund të bëhet edhe trajner i saj.
Gjatë kohës që drejtoi Dinamon, trajneri italian u dallua për mbështetjen që u dha lojtarëve të rinj, duke futur në formacion Mijën, më pas edhe Fejzullën dhe Lahon.
