Një shtetas spanjoll ka humbur jetën këtë të Martë në një hotel në Karavasta të Divjakës. Sipas hetimeve paraprake të policisë, dyshimet janë se ai është vetëvrarë me thikë. Në pyetje po merret një tjetër person, po me shtetësi spanjolle, i cili ishte prezent në dhomën e hotelit kur ka ndodhur ngjarja.
“Në fshatin Karavasta, Divjakë, në një hotel, shtetasi spanjoll F. C., 47 vjeç, dyshohet se ka dëmtuar veten me mjet prerës (thikë) dhe për pasojë ka humbur jetën. Sipas deklarimeve të para të shokut të tij të dhomës, shtetasit spanjoll O. V., 41 vjeç, rezulton se 47-vjeçari është dëmtuar me mjet prerës gjatë kohës që ka qenë duke bërë dush”, njoftoi policia.
“Nga ana e grupit hetimor, nën drejtimin e Prokurorisë, po kryhen veprime të thelluara hetimore për sqarimin e rrethanave të ngjarjes, për të përcaktuar shkakun e kryerjes së vetëvrasjes. Ndërkohë, është shoqëruar në ambientet e Policisë, shoku i dhomës, shtetasi O. V., për sqarimin e të gjitha rrethanave dhe mekanizmit të ngjarjes”, shtuan të njëjtat burime.
