Një aksident me dy persona të plagosur ndodhi pasditen e sotme në Vlorë. Sipas një rindërtimi paraprak të ngjarjes, një 45-vjeçar, nën drejtimin e një automjeti luksoz, përplasi fillimisht një këmbësore. Nuk ndaloi ti jepte ndihmën e parë apo të njoftonte autoritetet, por i dha gaz duke përplasur dhunshëm disa metra më tutje një tjetër automjet. Në bordin e këtij të fundit ishte një person që mbeti po ashtu i plagosur së bashku me këmbësoren. Të dy u transportuan në spital.
Shoferi 45-vjeçar i mjeti tip “Volkswagen Tuareg”, protagonist i aksidentit është Arlind Lagji, Drejtori i Doganës Fier deri pak muaj më parë. Lagji u shkarkua nga detyra pas një raportimi mediatik që tregoi se ai kishte kërcënuar me jetë dhe dhunuar një person, me bashkëshorten e të cilit kishte pasur marrëdhënie intime.
Aksidenti
Aksidenti këtë të Hënë u shënua në rrugën “Gjergj Kastrioti” rreth orës 17:40.
“Shtetasi A.L. (Arlind Lagji), rreth 45 vjeç, duke drejtuar automjetin tip ‘Volkswagen’ ka aksidentuar shtetasen I.S., rreth 66 vjeçe, këmbësore në rrugë. Drejtuesi i automjetit është larguar nga vendi i aksidentit dhe ka vijuar lëvizjen, në këtë aks rrugor, ku pas disa metrash është përplasur me automjetin me drejtues shtetasin B.C., 63 vjeç”, njoftoi policia.
I.S dhe B.C u transportuan në spital dhe ndodhen nën kujdesin e mjekëve, konfirmuan blutë.
“Drejtuesi i automjetit shtetasi A.L. (Arlind Lagji) u shoqërua në Komisariat, për veprime të mëtejshme”, dnërsa “grupi hetimor po kryen veprimet e mëtejshme për këtë rast”, shtuan të njëjtat burime.
Kërcënimi dhe dhunimi i qytetarit
Në Shtator 2022, një emision televiziv tregoi sesi Arlind Lagji, ende në detyrë si Drejtori i Doganës Fier, dhunoi dhe kërcënoi me jetë një qytetar, me bashkëshorten e të cilit ka pasur një lidhje jashtëmartesore.
Denoncuesi Algert Belulaj u shpreh se lidhur me kërcënimet bëri edhe denoncim në organet ligjzbatuese, por shtoi se ndaj Lagjit nuk u mor asnjë masë.
Kjo ishte arsyeja, shtoi ai, perse iu drejtua medias për rastin.
Në një audio-publikim të publikuar, Lagji i drejtohet Belulajt me fjalët: do të bëj thela thela që kur të dalësh në mes të Fierit të dridhet mishi…
Disa pamje të publikuara treguan momentet e dhunës së drejtorit ndaj Bellulajt. Ky i fundit tregoi se Arlind Lagji e kërcënoi me armë zjarri.
Pas publikimit të rastit, Arlind Lagji u shkarkua nga detyra.
