Shqipëria ka dhuruar 1 milion euro për Turqinë, pas tërmetit shkatërrimtar të 6 shkurtit.
Në Konferencën e Donatorëve në Bruksel, ishte zv/kryeministrja Belinda Balluku e cila foli për ndihmën dhe raportet që Shqipëria ka me vendet e prekura.
Pas tërmetit shkatërrimtar që goditi Turqinë dhe Sirinë në 6 shkurt 2023, në Bruksel është zhvilluar konferenca e Donatorëve. Për t’i ardhur në ndihmë shteteve të prekura, Shqipëria ka dhuruar 1 mlnn euro.
“Më shumë se çdo shtet tjetër Shqipëria ndien sot detyrimin për të mbështetur Turqinë në këtë moment kaq të vështirë. Sigurisht që është një shumë simbolike që duhet për rindërtimin, por është tregues i solidaritetit”, tha zv.kryeministrja Balluku.
Në një intervistë për Euroneës Albania, zv/kryeministrja Belinda Balluku tha solidariteti dhe respekti për Turqinë nuk nxitet vetëm nga fatkeqësitë, si ato të tërmeteve që kanë prekur vendet vitet e fundit.
“Marrëdhëniet me Turqinë janë testuar kohë pas kohe dhe gjithmonë Turqia ka qenë aty për ne dhe ne me sa mundësi kemi pasur kemi qenë pranë popullit turk. Marrëdhëniet mes dy qeverive janë të bazuara mbi besimin dhe padyshim mbi zhvillimin ekonomik që kemi pasur mes dy vendeve”, u shpreh Balluku.
Tërmeti 7.8 ballë me epiqendër në lindje të Turqisë shkaktoi 57 mijë viktima dhe 130 mijë të plagosur, ndërsa dëmet kapin vlerën e 100 miliardë dollarëve.
