Policia e Tiranës ka reaguar me një komunikatë për mediat lidhur me ngjarjen shokuese që u raportua se ka ndodhur mbrëmjen e djeshme në zonën e Freskut në kryeqytet, ku një grua është filmuar teksa hedh nga kati i 6-të i pallatit qenin e saj.
Rasti në fjalë është publikuar nga JOQ dhe është denoncuar nga fqinjët, të cilët bëjnë me dije se fatmirësisht qeni është gjallë por ka dëmtime të shumta në trup.
Video me përmbajtje të rëndë ka vënë në lëvizje policinë, të cilët kanë nisur hetimet për rastin në fjalë.
Materialet hetimore në lidhje me këtë çështje janë referuar në Prokurori, për veprën penale “Vrasja me dashje e kafshës së shoqërimit”.
“Çmendet” gruaja në #Tiranë, hedh nga kati i 6 i pallatit #qenin pic.twitter.com/EilPcoWSQv
— JOQ Albania (@JoqAlbania) March 16, 2023
Njoftimi i policisë:
Në lidhje me një video të postuar në portale, në të cilën shfaqet një shtetase duke keqtrajtuar një kafshë (qen), ju sqarojmë se:
Shërbimet e Komisariatit të Policisë Nr. 4, pas publikimit të pamjeve filmike, menjëherë kanë filluar hetimet për rastin në fjalë, sipas të gjitha dispozitave të parashikuara në Kodin Penal, dhe në përfundim të veprimeve kanë referuar materialet në Prokurori, për veprën penale “Vrasja me dashje e kafshës së shoqërimit”.
Drejtoria Vendore e Policisë Tiranë falënderon mediat dhe qytetarët që denoncojnë të gjitha rastet e paligjshmërive dhe i fton sërish ata që të denoncojnë në numrin 112.
