Nga Vlora, ku prezantoi kandidatin për kryetar bashkie të koalicionit “Bashkë Fitojmë”, Hysni Sharra, ish-kryeministri Salli Berisha i cilësoi zgjedhjet vendore të 14 majit si zgjedhjet më të rëndësishme politike që nga viti 1992.
Për të treguar rëndësinë e procesit, Berisha rreshtoi disa nga problemet më të rëndësishme, me të cilat përballet sot vendi, si emigrimi i të rinjve e profesionistëve, pagat e ulëta, korrupsioni, krimi dhe kriza e thellë ekonomike që po shoqërohet me rritje të frikshme të çmimeve.
Për të gjitha këto, Berisha ftoi vlonjatët që “t’i presin biletën Edi Ramës”, i cili sipas Berishës “është angazhuar në një luftë të pamëshirë kundër opozitës dhe pluralizmit”.
Nga qyteti bregdetar, Berisha komentoi situatën e vështirë ekonomike që po kalojnë familjet shqiptare dhe rritjen e inflacionit në shifra rekord, teksa qytetarët nuk arrijnë të mbyllin muajin me të ardhurat mujore.
Sipas kreut të PD, në 1 vit shqiptarëve u janë rritur me 12% vetëm shpenzimet për kafshatën e gojës, duke vendosur theksin te rritja e çmimit të ushqimeve të shportës.
“Duke ardhur këtu lexoja, në muajin shkurt çmimi i ushqimeve krahasuar me 1 vite më parë ishte 12% më i lartë. Çfarë do të thotë, secili prej jush shpenzon 12 % më shumë vetëm për kafshatën e gojës. Në 1 vit kjo. Po të marrim 8 vite sa bëjnë, bëjnë 30-40%, sepse ky njeri që është në pushtet, ngriu rrogat, nuk rriti rrogat, nuk rriti pensionet dhe kjo pastaj shndërrohet në rënkime, në lot mjerimi, në bindjen se ky vend nuk bëhet, se këtu nuk jetohet dhe ndaj shqiptarët ikin.
Por të gjitha këto nuk janë të vërteta. Nuk janë të vërteta sepse në rast se Edi Rama dhe kjo qeveri, të kishte dëshirë, zemër të shihte ju, të shihte shqiptarët, prap nuk po them të pasur, por të jetonin çdo vit e më mirë, ua them unë këtu ju, në mënyrë absolute me majë lapsi mund të kishte rritur rrogat të paktën 3 herë në 8 vite”, deklaroi ai.
Më tej Berisha shtoi se qeveria Rama ka dyfishuar taksat dhe ka rritur borxhin publik.
“Ky çfarë bëri? Po i lëmë të ardhurat se ky i dyfishoi taksat, po i lëmë mënjanë, por borxhin e rriti me 43%, është 107% sot. Por ky po të donte me këtë borxh, mund të rriste pa asnjë lloj vështirësie 3 herë rrogat. Vetëm me borxhin që mori në 2021 në shtator, 720 mln euro, rrogat e shqiptarëve mund të ishin rritur 70%. Por nuk ndodh kjo. Ky vendosi mbi shqiptarët një mekanizëm të tmerrshëm vjedhje që e kryeson vetë”, deklaroi Berisha.
Sipas liderit demokrat, rrogat në Shqipëri nuk rriten pasi kryeministri i fal në projektet e tij me koncesionarët që janë të lidhur ngushtë me qeverinë.
“Kryeministri prin me vjedhje, kryeministri firmos duke shkelmuar ligjin për ndërmarrjen e tij, 420 mln euro për djegësat e Shqipërisë. Asnjë djegës nuk ekziston sot, as në Tiranë, as në Fier, as në Elbasan. Kryeministri merr portin e Durrësit. Gjen një arab miliarder dhe thotë me vete, pse të mos bëhen edhe unë miliarder. Dhe merr me arabin 820 mijë metra katrorë truall toke, pasuria më e madhe publike sot e shqiptarëve. Ky udhëton me avion dhe ka shpenzuar 22 mln euro, me 137 fluturime, avioni i tij me dhomë gjumi luksoze Paratë e thashë edhe një herë, vidhen, por si vidhen. Kjo rrugë që keni ju, nga hyrja e Vlorës gjer në Levan, me gjithë urat mbi Vjosë është ndërtuar me 2.3 mln euro kilometri, me para të bankave europiane. Sa e ndërton rrugën në fushë Edi Rama, 24 mln euro kilometri”, argumentoi Berisha.
