Për nënkryetarin e Partisë Demokratike, Oerd Bylykbashi, votimi i sotëm në KAS për vendimin që i jep të drejtë grupit “Alibeaj” që të hyjë në zgjedhje me logon e PD, tregon ekzakt numrin e përfaqësuesve që Rama dhe Basha kanë në këtë institucion, të ndara në 4-1 në disfavor të opozitës.
Bylykbashi teksa ishte i ftuar në “Opinion” e ka mohuar mundësinë e listimit të kandidatëve të dalë nga primaret nën logon e Partisë Demokratike, që tashmë nga KAS iu dha Enkelejd Alibeajt.
“Demokratët do të votojnë kandidatët. Një fraksion edhe mund të vendosë të ikë. I duhet Ramës kjo, kanë vendosur ta mbajnë peng PD. Votimi 4 me 1, janë ekzakt numrat që kanë Rama me Bashën”, tha ai.
Më tej, Bylykbashi nënvizoi se grupimi tjetër i kësaj force politike po mban peng shumicën dhe kandidatët që kanë dalë nga vota e anëtarëve dhe simpatizantëve të Partisë Demokratike.
“Ajo që është e shtrembër në këtë histori është përpjekja për të mbajtur peng Partinë Demokratike dhe kandidatët e saj që kanë dalë nga vota e anëtarëve dhe simpatizantëve. Pra, është një përpjekje për të mbajtur peng me diçka që të gjithë e dinë se është fiktive juridikisht, fiktive politikisht dhe fiktive në aspektin statusor. Arroganca ka qenë përshembull ajo e 8 Janarit, kur selia u blindua. Ajo është arrogancë. Ajo që është e përcaktuar në të gjitha nivelet e Kushtetutës, në demokraci është që shumica vendos, dhe sigurisht respekton pakicën”, u shpreh Bylykbashi.
