Nga Boldnews.al
Kryetari i Bashkisë së Bulqizës, Lefter Alla, nuk është i pari kryebashkiak i Edi Ramës që përfundon në pranga.
Prokuroria e Posaçme njoftoi paraditen e sotme se ka arrestuar Allën, nën dyshimet se ka abuzuar me një tender me vlerë mbi 3 milionë euro. Bashkë me të janë arrestuar edhe zëvendësja e tij, si edhe zyrtarë të tjerë lokalë.
Më herët, në pranga kanë përfunduar edhe së paku tre kryebashkiakë të tjerë socialist.
Në vitin 2015, Prokuroria e Tiranës arrestoi kryetarin e Bashkisë së Kavajës në detyrë në atë kohë, Elvis Rroshi, i akuzuar për falsifikimin e formularit të dekriminalizimit.
Rroshi rezulton se kishte fshehur dënimin në Itali për përdhunim, si edhe ishte proceduar për trafik narkotikësh në Itali e Zvicër.
Për trafik narkotikësh u arrestua edhe Agim Kajmaku, ish-kryetari i Bashkisë së Vorës.
Kajmaku fillimisht ishte në kërkim për falsifikimin e formularit të dekriminalizimit. Por, pasi i shpëtoi me procedurë drejtësisë shqiptare, ai u largua nga posti zyrtar dhe iu rikthyer aktiviteti privat të shitjes së luleve.
Por, në qershor të vitit 2022, Kajmaku dhe nipi i tij arrestohen në Itali, duke transportuar rreth 20 kilogramë kokainë në një kamion me pleh kimik.
Më herët, në qershor të vitit 2021, me urdhër të SPAK-ut u arrestua kryetari i Bashkisë së Lushnjes, Fatos Tushe.
Ai u akuzua dhe u dënua për abuzim me një tender me vlerë rreth 200 mijë euro.
Gjykata anti-korrupsion e shkallës së parë e dënoi Tushen me periudhën e paraburgimit. Por, Apeli i shtoi dënimin pak ditë më parë dhe, për këtë arsye, Fatos Tushe u rikthye sërish në burg.
Ndërkohë, lista e kryebashkiakëve socialist nën hetim ose me kallëzime në SPAK është shumë më e gjatë.
Prokurorët e posaçëm kanë në duart e tyre fakte dhe prova të denoncuara për aktivitetin që lidhen me inceneratorët për kryebashkiakun e Tiranës, Erion Veliaj dhe homologët e tij të Durrësit e Fierit, Emirjana Sako e Armando Subashi.
