Partizani është shpallur mbrëmjen e sotme fitues i Ligës Unike në basketboll për femra. Skuadra kryeqytetase mundi 72-62 në finale Flamurtarin, në një ndeshje mjaft emocionuese të luajtur në qytetin e Vlorës (13-17, 20-25, 10-14, 18-16). Basketbollistet vendase shpresonin të triumfonin në këtë finale para tifozëve të tyre, por nuk ia dolën dot mbanë.
Partizani bëri një ndeshje të mirë, duke e dominuar sfidën në momentet vendimtare, sidomos në periodën e katërt, ku krijoi një epërsi të ndjeshme, të cilën e administroi deri në fund. Flamurtari bëri shumë gabime në gjuajtje dhe nën tabelë, aty ku kryeqytetaset u treguan më efikase, duke e merituar këtë sukses, i pari në Ligën Unike.
Jomyra Mythis me 22 pikë ishte shënuesja më e mirë e Partizanit dhe e ndeshjes, mbështetur nga Hanna Brych me 11 pikë e 11 rebound. Kjo e fundit u shpall edhe MVP e finales. Për Flamurtarin u dallua Samra Omerbasic me 16 pikë e 14 rebound, por që mbetën për statistikë.
Kjo është hera e parë që një ekip shqiptar fiton Ligën Unike, në edicionin e saj të dytë. Faza finale e këtij turneut të nisur që në tetor (morën pjesë 3 skuadra nga shqipëria e 3 nga Kosova), u zhvillua për dy ditë me radhë në Vlorë. Në vendin e tretë, në derbin kosovar, ekipi i Bashkimit mundit 68-63 Prishtinën, duke marrë medaljet e bronzta.
