Relatori i çështjes që do të shqyrtojë ankimin e grupit Alibeaj në KAS do të jetë Koli Bele.
Ai u zgjodh përmes shortit të hedhur mëngjesin e kësaj të Mërkure në KQZ, lidhur me ankimin e bërë nga përfaqësuesi ligjor i grupit Alibeaj që kundërshton vendimin e kryekomisionerit Celibashi. Ky i fundit nuk e regjistroi si PD grupin Alibeaj, për zgjedhjet lokale të 14 Majit.
Më vonë gjatë ditës, KAS vendosi ta shqyrtojë ankimin ditën e nesërme, në orën 12:00.
Në mbledhjen e djeshme, Celibashi rrëzoi kërkesën e grupit Alibeaj për regjistrimin në zgjedhjet e ardhshme lokale. Sipas tij, kryetar i partisë rezulton ende Lulzim Basha dhe është ai që duhet të firmosë “deklaratën solemne” dhe jo Enkelejd Alibeaj, siç rezultonte në dokumentacionin e dorëzuar në KQZ.
Ilirjan Celibashi rrëzoi po ashtu dhe kërkesën e PD-së së drejtuar nga Sali Berisha për tu regjistruar në zgjedhje, duke argumentuar se kryetar i partisë, sipas dokumenteve në regjistrin e partive politike në gjykatën e Tiranës, rezulton Lulzim Basha.
Franc Nuri, përfaqësuesi ligjor në Komisionin Qendror të Zgjedhjeve i Partisë Demokratike, paralajmëroi ankim në KAS kundër këtij vendimi. Ankimi, tha ai në një deklaratë publike, pritet të dorëzohet këtë të Mërkurë.
