Kryetari i Bashkisë së Bulqizës, Lefter Alla, është arrestuar nga policia mbrëmjen e sotme pasi një urdhër-arresti është lëshuar nga Prokuoria e Posaçme (SPAK).
Paraprakisht mësohet se drejtuesit socialist akuzohet për korrupsion dhe abuzim me tenderat publik, ndërsa burime bëjnë me dije se bashkë me të janë shoqëruar edhe disa zyrtarë të Bashkisë së Bulqizës, që kanë qenë anëtarë të komisioneve për tendera publikë.
Urdhër ndalimet për ta janë firmosur nga SPAK, ndërsa hetimet në ngarkim të tyre kanë zgjatur të paktën 6 muaj.
Dyshohet se bashkia e Bulqizës ka firmosur dy tendera mbi 200 mijë euro për asflatime rrugësh. Dyshimet janë se komisioni i ofertave ka skualifikuar ofertat më të mira dhe kanë favorizuar një tjetër që nuk i përmbushte kriteret.
Kujtojmë se më parë, Lefter Alla ka qenë në hetim nga SPAK gjatë kohës kur u publikua videon e tij duke konsumuar lëndë narkotike në ambientet e një lokali.
Asokohe hetuesit morën në pyetje Allën, i cili akuzohej për prodhim dhe mbajtje të lëndëve narkotike.
Lefter Alla u thirr në SPAK për të dhënë shpjegime rreth videos, teksa deklaroi se nuk mbante mend të kishte patur episode të tilla dhe pavarësisht ngjashmërisë me personin në video, ai filmim nuk kishte të bënte me të.
Në ndalesën e dytë në SPAK, Alla sqaroi përpara prokurorit Eneid Nakuçi, se nuk e kujtonte se ku ka qenë në periudhën në të cilën është regjistruar videoja, dhe se kur ka qenë në atë lokal.
Po ashtu, kryebashkiaku i Bulqizës mësohet të jetë shprehur se videoja e publikuar i përket kohës para se ai të merrte mandatin e qytetarit të parë të Bulqizës.
Alla është shprehur asokohe se nuk është përdorues i lëndëve narkotike.
Kryebashkiaku i Bulqizës i kërkoi prokurorisë ti vinte në dispozicion një filmim me të qartë, me qëllim që të mund të jepte shpjegime të detajuara, ndërkohë që për personat e tjerë që shfaqeshin në video, Alla deklaroi se nuk i njihte.
Në kuadër të hetimit, kryebashkiaku iu nënshtrua dhe testit të drogës, prej nga rezultoi se ai nuk ishte përdorues i lëndëve narkotike, ndërsa Prokuroria urdhëroi gjithashtu dhe ekspertimin teknik të videos ku pretendohej se shfaqej Alla.
Në dosje përfundimtare me të cilën SPAK pushoi më pas hetimet për Allën, thuhej se ekspertët dolën në konkluzionin se filmimi nuk është marrë drejtpërdrejtë nga pajisja regjistruese, por është regjistruar me aparat celular, nga ekrani i një kompjuteri.
Ndaj për këtë këtë arsye, nuk mund të përcaktohej qartë sipas organit të akuzës data dhe ora reale e regjistrimit, si dhe nuk mund të identifikoheshin personat që shfaqen në të.
“Nga analiza e të gjitha veprimeve hetimore të kryera, rezulton se nuk mund të realizohet identifikimii i shtetasit që paraqitet në pamjet filmike dhe aq më tepër që ai të jetë lefter Alla”, thuhej në dosjen e SPAK.
