Verifikimi i fundit i Fatjon Muratit nga autoritetet, nëse po e zbaton masën e sigurisë arrest shtëpie, është bërë më 7 Mars.
Detaji jepet nga Policia e Tiranës në një njoftim zyrtar lidhur me atentatin me 1 viktimë dhe 6 të plagosur në Don Bosko (mes tyre mbesa 10 vjeçe e viktimës nga ciflat e xhamit që u përhapën pas të shtënave).
Blutë rindërtojnë dhe dinamiken e krimit, si dhe zbardhin lëvizjet e dyshuara të autorëve pas të shtënave.
3 të plagosur ende në spital
Policia bën me dije se rreth orës 21:05, në rrugën “Anastas Shundi”, në drejtim të lokalit në pronësi të Fatjon Muratit është qëlluar me armë zjarri automatike dhe për pasojë ka mbetur e vrarë Mimoza Paja, 58 vjeçe, e cila ishte e punësuar si banakiere, si dhe janë plagosur 5 shtetas (me armë zjarri), 3 prej të cilëve vazhdojnë të jenë në spitalin e Traumës duke marrë ndihmë mjekësore.
Automjeti i djegur
Grupi i posaçëm hetimor, shtojnë blutë, ka vazhduar kryerjen e veprimeve në vendin e ngjarjes, gjetjen dhe sekuestrimin e provave materiale, pyetjen e të dëmtuarve dhe dëshmitarëve okularë dhe sekuestrimin e pamjeve filmike. Ditën e sotme është rikqyrur vendi i ngjarjes, ku janë gjetur dhe sekuestruar edhe disa prova të tjera të vlefshme për hetimin.
Po sot, në orët e para të mëngjesit, në vendin e quajtur “Ura e Sul Meres”, në territorin e fshatit Likmetaj, strukturat e Drejtorisë Vendore të Policisë Durrës kanë konstatuar një automjet të djegur, brenda të cilit janë gjetur 3 armë zjarri automatike.
Grupi hetimor ka këqyrur automjetin e djegur dhe ka sekuestruar disa prova, që vlerësohen të vlefshme për hetimin. Nga verifikimi i numrit të shasisë së automjetit rezulton se ky mjet tip BMË, seria 5, (525) me ngjyrë gri, ishte vjedhur gjatë natës më datë 14.03.2021, në lagjen nr 13 Durrës.
Të gjitha provat materiale të sekuestruara në vendngjarje në rrugën “Anastas Shundi” dhe në fshatin Likmetaj, janë dërguar në Institutin e Policisë Shkencore ku po u nënshtrohen ekzaminimeve të mëtejshme.
Dinamika
Lidhur me dinamikën e atentatit, policia njofton se autorët janë afruar me automjetin tip BMW, me targa të huaja në rrugën “Anastas Shundi”. Aty kanë ndaluar makinën përbri lokalit të Muratajt dhe dy nga autorët kanë zbritur nga makina duke hapur zjarr me breshëri në drejtim të lokalit.
Pas kësaj, autorët kanë hipur në automjet dhe janë larguar me shpejtësi në drejtim të spitalit ushtarak, kanë vazhduar në autostradën Tiranë – Durrës, kanë devijuar rrugën në mbikalimin e Vorës dhe kanë djegur automjetit në fshatin Likmetaj.
Murataj i verifikuar më 7 Mars
Sipas të njëjtave burime, strukturat e Krimeve të Rënda në Drejtorinë Vendore të Policisë Tiranë, nën drejtimin e Prokurorisë së Rrethit Gjyqësor Tiranë dhe me mbështetjen e Departamentit të Policisë Kriminale në Drejtorinë e Përgjithshme të Policisë së Shtetit, janë duke analizuar informacionet për autorë të dyshuar dhe për motivet e kësaj ngjarjeje.
Më tej në njoftim, policia saktëson se verifikimi i fundit nëse 32-vjeçari Murataj po e zbatonte masën e sigurisë së arrestit me burg është bërë më 7 Mars.
Ditën e djeshme, teksa efektivët shkuan në banesën e tij, nuk e gjetën aty dhe në këto kushte u shpall në kërkim.
“Pronari i lokalit Fatjon Murataj është nën hetim nga Prokuroria e Rrethit Gjyqësor Tiranë për veprën penale “Mbajtja pa leje e armëve dhe municionit luftarak” dhe po hetohej me masën e sigurimit “Arrest në shtëpi”. Më datë 07.03.2023, shërbimet e Policisë së Komisariatit Nr. 3, në zbatim të procedurave standarde të punës, kanë kontrolluar dhe gjetur në banesë shtetasin Fatjon Murataj, ndërsa në kontrollin e datës 12.03.2023, gjatë kontrollit ky shtetas nuk është gjetur në banesë dhe është shpallur në kërkim dhe punohet për gjetjen dhe arrestimin e tij”, thuhet në njoftim.
Shpërblimi
Më tej, Policia fton qytetarët që të japin informacion për autorët e kësaj ngjarjeje dhe vendos shpërblim prej 20 mijë euro, “për çdo informacion të vlefshëm që do çojë në identifikimin e autorëve”.
Policia vendos në dispozicion numrin e telefonit 069 41 11 546.
