Automjeti që dyshohet se u përdor nga autorët që kryen atentatin e mbrëmjes së djeshme në zonën e “Don Boskos” është gjetur i djegur.
Mësohet se mjeti i djegur tip “BMW”, është gjetur në zonën e Fushë Krujës, më konkretisht në një cep të kryqëzimit që të çon për në fshatin Likmete dhe të nxjerr në autostradën Fushë Krujë-Milot, në vendin e njohur si “Ura e Sul Merës”.
Brenda makinës janë gjetur edhe dy armë të llojit kallashnikov, ndërsa në vendngjarje ndodhen ekspertë të policisë shkencor, të cilët do të kryejnë ekzaminimin e tyre për të gjetur gjurmë të mundshme që çojnë drejt autorëve.
Dyshohet se autorët e kanë përdorur për t’u larguar nga vendngjarja, pasi kryen një masakër në lokalin, që është në pronësi të Fatjon Muratit, duke lënë të vdekur banakieren Mimoza Paja dhe të plagosur 4 persona të tjerë.
Breshëria e plumbave ndaj lokalit në kryeqytet ndodhi pak pas orës 21:00 të mbrëmjes, kohë kur klientët ishin të shumtë pasi po ndiqnin një ndeshje futbolli.
Të plagosurit nga kjo ngjarje janë Astrit Meraj, 42 vjeç, Emanuel Sala, 47 vjeç Ermir Bejuku, 45 vjeç, Genc Shohalli, 55 vjeç.
E plagosur, jo nga plumbat por nga copëzat e xhamave që u bënë “shoshë” me plumba ka mbetur një vajzë e mitur, 10 vjeçe, e cila raportohet të jetë mbesa e viktimës.
Objektivi mendohet se ka qenë xhaxhai i Fatjon Muratit, Sahiti, i cili ka marrë plumb në shpatull por ndodhet jashtë rrezikut për jetën. Dyshimet e para që lindin megjithatë të çojnë te një konflikt që mund të lidhet me ngjarjet për të cilat është akuzuar më parë pronari i lokalit, i cili ka qenë i dyshuar edhe si pjesëmarrës në masakrën e Fushë-Krujës, ku mbetën të vrarë Brilant Martinaj, Diklen Vata dhe Besmir Hoxha.
