Masakra e mbrëmjes së djeshme në lokalin në pronësi të vëllait të Fatjon Muratit, në zonën e “Don Boskos”, ka tronditur opinionin publik, pasi krejt pa faj u ekzekutua banakierja Mimoza Paja, ndërkohë që u plagos mbesa e saj 10-vjeçare dhe 5 persona të tjerë.
Ajo çka e rëndon pozitën e drejtësisë në këtë ngjarje, është fakti se Fatjon Murati, edhe pse i arrestuar me një arsenal armësh, i dyshuar si autor i masakrës së Fushë Krujës dhe me 5 milionë euro pasuri të sekuestruara, i ishin hapur dyert e qelisë nga autoritetet.
Pas arrestimit në tetor dhe një kërkesë të rrëzuar në Apel për zbutje të masës së sigurisë, Murataj larg vëmendjes së syrit të medias, ishte lënë në “arrest në shtëpi” prej dhjetorit të vitit të kaluar.
Gjykata e Tiranës me vendimin e dhënë nga gjyqtarja Migena Laska më 28 dhjetor i ka zbutur masën e sigurisë nga “Arrest me burg” në “Arrest në shtëpi”, 32-vjeçarit, duke argumentuar se prokuroria nuk ka siguruar prova që të arsyetonin lënien në qeli të Muratit.
Pavarësisht argumentave të gjykatës, gazetarja e kronikës, Anila Hoxha shprehet se Fatjon Murati është i lirë për faj të gjyqtarëve.
Në një kohë kur duhej të ishte pas hekurave, ai ishte dje objektivi kryesor, të cilit iu dërgua një mesazh nga kundërshtarët, pasi në ambientet e lokalit në momentin kur u qëllua me breshëri kallashnikovi ndodhej edhe vëllai, xhaxhai dhe djali i xhaxhait të 32-vjeçarit.
“Kemi dy vendime që i transmetuam edhe në edicionin e lajmeve që tregojnë se drejtësia dhe institucionet shqiptare nuk bëjnë një punë hetimore, por vetëm i gërvishtin anëtarët e grupeve kriminale, vetëm në momentet e para ideklarojnë sa për sy e faqe për mediat si njerëz të rrezikshëm, por secili prej tyre jep një kontribut të devotshëm që këta të dalin jashtë. Njëri vendim tregon se Fatjon Murati ka rrezikshmëri të lartë shoqërore për këtë arsye duhet lënë në arrest me burg, vendimi tjetër konsiston se për individin nuk provohet prezenca e rrezikshmërisë së veçantë, është i parrezikshëm thotë gjykata, madje thotë se arma me të cilën ishte arrestuar nuk ishte kryer asnjë ngjarje kriminale me të, duhej të shkonte të shtëpi të kujdesej për nënën e tij”, zbuloi gazetarja.
Ajo theksoi se Murati duhej të ishte në burg për veprat penale që kishte kryer, ndërsa nuk ndodhej në shtëpi edhe pse ishte me masën “arrest shtëpie’.
“Këtij shtetasi iu vendosën nën sekuestro pasuritë e tij, në ato pasuri të vendosur nga shteti ka ndodhur një ngjarje, është nën mbikqyrjen e agjencisë, administrohej nga agjencia. Në datën 7 mars 2023 pasi doli me arrest shtëpie ai doli për veprën e armëmbajtjes. Ai qëndroi 3 muaj për “armëmbajtje pa leje”, ndërkohë që kemi qytetarë që kapen me shkopa bejsbolli për shkak se quhet armë e ftohtë qëndrojnë në paraburgim. Me punën aspak të mirë të policisë dhe vulën e gjykatës. Ai duhet të japë llogari. Burgjet i kemi të mbushura me qytetarë që nuk kanë bërë vepra. Ky person shkon në “arrest në shtëpi” e kontrollohet dhe pesë ditë më vonë nuk gjendet më në shtëpi”, nënvizoi Anila Hoxha.
LEXO EDHE:
Masakra në Tiranë/ Argumentet e Gjykatës: Ja pse u lirua nga qelia Fatjon Murati
