Pak më shumë se një orë kohë para përfundimit të afatit prej 48 orë që KQZ i ka lënë grupit të “Alibeajt” për të depozituar dokumentacionin e plotë me firmën e Lulzim Bashës mbi “deklaratën e angazhimit solemn të kryetarit të partisë politike”, në mënyrë që të regjistrohen në zgjedhjet lokale të 14 majit, Enkelejd Alibeaj i është drejtuar me një letër Ilirjan Celibashit.
Alibeaj përmes përfaqësuesit të tij ligjor Indrit Sefa i bën me dije kreut të KQZ se Lulzim Basha është dorëhequr si kryetar i PD më 21 mars 2022 dhe dokumentacioni i paraqitur përmes përfaqësuesit të tij ligjor Indrit Sefa në mbledhjen e së enjtes të KQZ, është i plotë e në përputhje me ligjin.
Por, kreu i KQZ Ilirjan Celibashi ishte i prerë kur i komunikoi grupit “Alibeaj” se pavarësisht se do të njohë PD e drejtuar ende nga Basha për shkak të ligjit dhe fuqisë së vendimit të gjyqësorit si subjekti zgjedhor që duhet regjistruar në zgjedhje, ai nuk do japë konfirmimin për asnjë parti politike, nëse deklarata e kryetarit të partisë nuk shoqërohet me nënshkrimin e tij.
Ndërkohë, vetë Alibeaj teksa u pyet nga gazetarët mbrëmjen e djeshme nëse do të dërgojnë në KQZ shkresën që kërkoi kryekomisioneri apo do të dërgojnë çështjen në KAS, deklaroi se nuk mund të ketë firmë nga Lulzim Basha pasi ai është i dorëhequr.
“Jo, e kemi bërë të qartë dje. Dorëheqja e zotit Basha është fakt publik tashmë. Sqarimi përkatës edhe shkresor ne do ta dërgojmë pranë KQZ-së. Kështu që nuk mbetet asgjë për t’u diskutuar. Praktika edhe në zgjedhjet e mëparshme është e mbështetur në Kodin Zgjedhor, kështu që kjo është një çështje e zgjidhur”, tha ai.
