Vetëm pak minuta pas një takimi “kokë më kokë” me aleatin Ilir Meta që zgjati 40 minuta dhe 24 orë pasi KQZ njohu PD me Lulzim Bashën si subjekt politik që mund të regjistrohet në zgjedhje, Sali Berisha u ngacmua në konferencën për shtyp, për formulën me të cilën do të regjistrohen kandidatët e “Primareve”.
Duke vendosur theksin te pranvera që do të sjellë ndryshimin e madh, ish-kryeministri ka konfirmuar se koalicioni me Partinë e Lirisë për zgjedhjet lokale të 14 majit është fakt i pamohueshëm.
Insistimit të gazetarëve për të mësuar se çfarë ndodh me listat për këshillat bashkiakë, teksa PL publikoi të enjten emrat për Tiranën, Berisha iu përgjigj duke thënë se “po studiohen modalitete të tjera”.
“Në rrafshin politik do të jetë një spektër i gjerë koalicionesh me partitë opozitare. Ne e kemi deklaruar këtë javë që jemi në kolacion me Partinë e Lirisë. Jo koalicioni, forma është në diskutim. Për Këshillat bashkiakë po studiohen modalitete të tjera. Sa i përket koalicionit kjo është përfundimtare. Se çka bërë zoti Meta dje, është përgjegjës zoti Meta. Koalicioni do të jetë fitues, ju siguroj. Partia Demokratike do të drejtojë kolaicionin, pa diskutim!”, u shpreh Berisha.
Duke komentuar takimin e kësaj të premte me Metën në zyrën e tij në selinë blu, Berisha tha se “diskutimi ishte për bashkërendim të të gjithë forcave për fitoren e 14 majit”.
“Të gjitha janë në diskutim. Ishte diskutim i zgjeruar, për fitoren, ne, shqiptarët presin fitoren nga opozita dhe ne jemi të sigurtë. Mos harro një gjë, Edi Rama e di që është mundur dy herë nga Sali Berisha, është mundur dhe kjo e treta e pret shumë shpejt”, nënvizoi ai.
Lideri i opozitës gjithashtu u ndal te ftesa që grupi “Alibeaj” ka bërë nga mbledhja e tyre por edhe vijon të bëjë nëpërmjet përfaqësuesve në çdo dalje në media, drejtuar kandidatëve të “Primareve” për të garuar me logon e PD, pasi Gjykata e Apelit iu la në duar vulën duke dërguar çështjen për rigjykim në Shkallën e Parë.
Berisha ishte i prerë në qëndrimin e tij duke thënë se nuk do të negociojë kurrë më “Alibashë-Bravën”, referuar Enkelejd Alibeajt dhe Lulzim Bashës, të cilët i konsideroi dy pengje të Edi Rqamës.
“Rama sikur të mbledhë të gjithë bravat dhe Alibashët e Ballkanit është i pashpresë. Reagimi qytetar është i jashtëzakonshëm. Me të gjitha aktet e tij, vjedhjet e panumërta, qëndrimet anti demokratike, lidhjet me drogën, kupa u derdh me vendimin për të emëruar opozitën që dëshiron “Alibasha-Brava”. Me këtë start siguroj shqiptarët se kjo do të jetë pranvera e ndryshimit të madh. Ju e dini se veprimet e Edi Ramës ishin veprime in extremis, të një njeriu të tmerrua, që rryma po e çon drejt McGonigal dhe që përpiqet të kapet në fije bari si ‘brava’ dhe ‘alibasha’. Tjetër është morali i Ramës dhe pengjeve të tij, tjetër është morali i shqiptarëve”, theksoi Berisha.
