Një grup prej me 105 emigrantë të shpëtuar në ujërat e Mesdheut ka mbërritur në portin italian të Brindizit në bordin e anijes “Life Support”. Mes emigrantëve kanë qenë edhe një grua shtatzënë dhe rreth 30 fëmijë të mitur, duke filluar nga mosha 2 vjeç.
Shpëtimi vjen në një kohë kur zbarkimet në Itali janë shumëfishuar. Në qendrën e refugjatëve në ishullin e Lampeduzës, me kapacitet për 300 persona, aktualisht ndodhen 3 mijë emigrantë të ardhur në ditët e fundit.
Ndërkohë, nga lokaliteti kalabrez Kutro, ku në fund të shkurtit humbën jetën rreth 70 emigrantë, kryeministrja italiane Giorgia Meloni përsëriti mesazhin se qeveria e saj është e vendosur ta mposhtë trafikun e qënieve njerëzore.
“Jemi këtu për të dhënë një sinjal simbolik por edhe konkret të faktit se qeveria është e vendosur të mposhtë trafikun e qënieve njerëzore, që është shkaku i vërtetë i tragjedive si ajo e 26 shkurtit”, deklaroi Meloni.
Ndërkohë, 14 emigrantë nga zona nën-Sahariane u mbytën të enjten në ujërat tuniziane. Por kjo tragjedi ka një tjetër faktor.
Grupi po përpiqej t’u shpëtonte sulmeve të nisura në vend pas komenteve raciste të presidentit Kaid Saied, që akuzoi popullsinë nën-Sahariane se ishin pjesë e një komploti me qëllim ndryshimin demografik të vendit.
