Zhurije Fjolla, 56 vjeçe u ka dhënë një mesazh grave pasi ka rritur e vetme fëmijën e saj, pas divorcit nga bashkëshorti. Një ditë pas 8 Marsit, ajo rrëfen për Top Channel se gratë duhet të kenë prioritet në jetë të qenit të zonjat e vetes dhe të pavarura si dhe të kërkojnë më shumë të drejta.
“Në këtë 8 mars dua t’iu them grave shqiptare të jenë të zonjat e vetes e të kuptojnë rëndësinë e tyre në çdo ditë të jetës. Jeta të përball me shumë vështirësi ndaj duhet të jemi të forta dhe të mos nënshtrohemi”, tha Zhurije Fjolla për Top Channel.
Zhurija thotë se ka lindur në një kohë kur fjala e burrit ishte ligj dhe ku vajzat përgatiteshin për të nderuar familjen në shtëpinë e burrit.
“Më thoshte mamaja gjithmonë akoma ske mësuar bakllavanë… do shkosh te burri bobo,”- shton ajo.
Fjolla u martua në vitin 1999 dhe dy vite më pas u bë mamaja e një djali. Por martesa e saj nuk shkoi mirë, ndaj Zhurija mori vendimin të divorcohej e të përballej me sfidat si nënë e vetme.
“8 vite kam që e rris vetëm djalin. Momenti më i vështirë ka qenë ndarja sepse djali ishte 12 vjeç, e duhet të punoja shumë që të rritej si gjithë të tjerët,”- tregon ajo./TCH
