Tre viktima dhe katër të plagosur është bilanci i aksidentit të ndodhur pasditen e kësaj të Enjteje, në Tiranë.
Të vdekura kanë mbetur dy vajza, konfirmoi policia e Tiranës në një njoftim zyrtar paraprak lidhur me aksidentin të ndodhur te mbikalimi pranë rreth-rrotullimit të TEG-ut. Më vonë në spital, humbi jetën dhe një 20-vjeçar, i identifikuar si Klevis Ruçaj.
Sipas hetimeve paraprake, një automjet tip “Audi” ka çarë barrierat e rrugës dhe ka rënë nga mbikalimi në aksin rrugor poshtë tij, duke aksidentuar aty një tjetër makinë tip “Honda”.
Për pasojë, vajzat pasagjere në automjetin tip “Audi”, dhe drejtuesi Klevis Ruçaj, kanë humbur jetën. Mësohet se dy pasagjeret që udhëtonin me “Audi A8” që drejtohej nga Ruçaj, janë shtetaset Erisilda Abedini (22 vjeçe) dhe Sikela Përroj (23 vjeçe). Nga policia bëjnë me dije se vajzat janë në moshë të re, rreth të 20-tave.
Ndërkohë, të plagosur kanë mbetur edhe tre persona të tjerë që ndodheshin në bordin e automjetit “Honda”. Sipas policisë, ata janë Alda Kurti, 51 vjeçe, O.K., 24 vjeç dhe Qemal Kurti, rreth 60 vjeç, drejtues i automjetit.
Aksidenti
“Rreth orës 17:55, në rreth-rrotullimin pranë qendrës tregtare ‘TEG’, ka ndodhur një aksident rrugor ku janë përfshire automjeti tip ‘Audi’ dhe automjeti tip ‘Honda’.
Referuar mekanizmit dhe të dhënave paraprake dyshohet se automjeti tip ‘Audi’ me drejtues shtetasin Klevis Ruçaj, 20 vjeç, ka qenë duke udhëtuar ne unazën lindore me drejtim lëvizje nga Farka për tek rreth-rrotullimi pranë Teg.
Pasi ka humbur kontrollin duke thyer barrierat rrethuese te mbikalimit, ka përfunduar në autostradën Tiranë-Elbasan, duke aksidentuar automjetin tjetër tip ‘Honda’, me drejtues shtetasin Qemal Kurti, rreth 60 vjeç”, njoftoi policia.
