Qëndrimi prej tre vitesh në Tiranë, për ambasadoren e SHBA-ve Yuri Kim duket se ka shërbyer për ta njohur më mirë Shqipërinë, e madje për të adaptuar edhe taktikat e propagandës, të stilit Rama-Veliaj.
Ambasadorja amerikane këtë paradite, si rrallëherë është shfaqur “live” në dy aktivitete njëkohësisht.
Prej orës 10:20 ambasadorja u shfaq live në platformat e rrjeteve sociale dhe televizionet informative, teksa merrte pjesë në një aktivitet të përbashkët me Ministrinë e Mbrojtjes, për rastin e 8 Marsit.
Ambasadorja së bashku me ministrin Niko Peleshin, në këtë aktivitet që zgjati për rreth një orë folën për rolin e vajzave dhe grave si pjesë e rëndësishme e Forcave të Armatosura.
“Vajzat dhe gratë, si pjesë e rëndësishme e FA kanë edhe rolin e tyre në sfidat e sigurisë, me të cilat përballet sot Evropa dhe e gjithë bota. Me ambasadoren Yuri Kim dhe Komandanten e Gardës Kombëtare të Nju Xhersit Gjeneral brigade Lisa Hou për të diskutuar për fuqizimin e pjesëmarrjes së grave në sektorët më prioritarë të mbrojtjes”, shkruante ministri i Mbrojtjes Niko Peleshi përkrah transmetimit live në Facebook të aktivitetit.
Por paradoksi është se vetëm 10 minuta pasi nisi transmetimi “LIVE” i aktivitetit ku edhe Kim ndodhej, ambasadorja u kap nga kamerat e televizioneve duke hyrë në selinë e Partisë Socialiste.
Prej orës 10:40, Yuri Kim ka nisur kështu një takim “kokë më kokë” në selinë rozë me Sekretarin e Përgjithshëm, Damian Gjiknuri, ku me shumë gjasë është diskutuar situata politike në vend dhe zgjedhjet e 14 majit, nisur dhe nga vendimi i Gjykatës së Apelit për të dërguar për rigjykim çështjen e vulës së PD.
Takimi në selinë e PS ka përfunduar në orën 11:13, rreth 5 minuta pasi u mbyll edhe aktiviteti në Ministrinë e Mbrojtjes.
Me një metodë “alla- Lali Eri” me kaseta të gatshme dhe pa lejuar prezencën e mediave në aktivitetet zyrtare, diplomatja amerikane arriti sot që të gjendej njëkohësisht edhe në Ministrinë e Mbrojtjes që ndodhet në “rrugën e Dibrës”, por edhe në selinë e PS, që gjendet në sheshin “Austria”, praktikisht në dy skaje të ndryshme të kryeqytetit.
