Edhe pse ishte i burgosur për dhunë në familje sjellja e tij në burg ka treguar se Dan Hutra nuk ishte rehabilituar, ndërsa nuk kishte krijuar besueshmëri për një qëndrim korrekt edhe jashtë institucionit.
Sipas dokumentit i cili flet për sjelljen 6-mujore të 40-vjeçarit në burgun Jordan Misja, tregohet qartazi se vrasësi i tri grave dhe i plagosjes së tre të tjerave ka qenë problematik gjatë qëndrimit në burg.
Grupi i 5 ekspertëve ka vlerësuar periudhën qershor deri në fund të dhjetorit të vitit 2022, ndërsa në të thuhet se Hutra ka pasur probleme dhe në marrëdhënie me bashkëvuajtësit e tjerë në burg.
Por veç fjalëve fyese ndaj bashkëvuajtësve të tjerë, për të cilat burgu kishte marrë masa disiplinore, ajo që bie në sy është kriteri i besueshmërisë. Sipas komisionit të vlerësimit kur 40-vjeçarit i mbeteshin dhe 2 muaj dënim, me sjelljen dhe qëndrimin e tij, nuk krijonte besueshmëri për një qëndrim korrekt edhe jashtë institucionit.
Këto kritere të cilat ende nuk dihet nëse i janë raportuar policisë, anëtarët e komisionit dolën në konkluzionin se Dan Hutra nuk ka shfaqur sjellje dhe qëndrim në raport me institucionin, por edhe nuk ka respektuar rregullat e burgut ndaj dhe u vlerësua negativisht.
Por edhe pse sjellja e tij psiko-emocionale nuk ishte e qëndrueshme ndërsa nuk pranonte veprën penale të dhunës në familje ndaj Elena Hysës, Hutra kishte kohën e mjaftueshme për të përgatitur planin e vrasjeve.
I dënuar që në vitin 2007 për vrasje me paramendim ndaj ish-bashkëshortes, më 1 mars, 40-vjeçari i mori jetën dy grave në shtëpinë e ish-bashkëshortes së tij, ndërsa fjalët fyese me të burgosurit e tjerë ai i përktheu në një tjetër vrasje. Menjëherë, pasi qëlloi me breshëri ndaj anëtarëve të familjes Hysa ai i mori jetën 31-vjeçares Etleva Kurti, vetëm sepse kishte konflikte me të vëllain e saj në burg, Vladimir Kurti.
/A2 News/
