Nga Boldnews.al
Duhet të ishte një çështje tërësisht juridike, ama që në mëngjes u kthye mirëfilltas politike. Më 3 mars, në Gjykatën e Apelit të Jurdidiksionit të Përgjithshëm, u vendos që logo dhe vula e PD-së t’i kalonin Enkelejd Alibeajt, duke rrëzuar vendimin e mëparshëm të Gjykatës së Shkallës së Parë që njihte Kuvendin Kombëtar të PD-së të mbajtur më 11 dhjetor 2021, me kryetar Sali Berishën. Vetëm tre ditë para afatit të fundit të regjistrimit të subjekteve politike, Gjykata e Apelit nuk i zhgenjeu pritshmëitë, pasi pavarësisht së drejtës, apo provave të paraqitura nga palët, çdo gjë ishte vendosur, nga dy “fuqi madhore”.
Së pari, më i interesuari që PD të jetë e çarë dhe përçarë, duke i dhënë “jurdikisht” të drejtën një grupimi të vogël, është kryeministri Edi Rama. Mënyrën për të shkuar deri në atë pikë e gjeti duke përdorur tre “Kadinj” (gjyqtarë të trembur). Forca e dytë madhore që zhbën ndonjëherë edhe të parën, padyshim që ishte ambasada amerikane në Tiranë. Dy përfaqësues të saj u futën në sallë dhe zunë vend në fundin e saj, duke pasur një pamje edhe më të qartë për të tre gjyqtarët që edhe ata duhet të futeshin në lojë për të treguar sipkur po shqyrtonin provat, apo diskutonin në aspektin juridik.
Vendimin e paracaktuar pa dashje e zbuloi pak ditë më parë kreu i Grupit Parlamentar të PS-së i cili qartësisht i tha grupimit të Rithemelimit se davanë në gjykatë e kishin të humbur. Kjo u përforëcua nga vetë kryeministri dhe më pas një ministre e tij që bënte be e rrëfe duke siguruar ambasadorët e huaj në vendin tonë se çdo gjë do shkonte sipas parashikimit, pasi partinë më të madhe opozitare do ta linin në duart e një grupimi të vogël.
Gjyqi në vetvete i përngjante një senace që të kujtonte “drejtësinë e Sulltanit”, ku Kadinjtë (gjyqtarët), vulosnin gjoja në emër të drejtësisë së pavarur një urdhër të Sulltanit. Në fundin e çdo procesi kur merrej vendimi nga gjyqtarët e kohës Otomane, shpreheshin: Me Rizanë e Allahut dhe Irade Samijen e Padishahut, gjykata vendosi….
Urdhri i Ramës ishte i qartë, por edhe Irade Sanija e Padishahut me qëndrim diku në Rrugën e Elbasanit kërkonin pikë për pikë atë që vendosën tre Kadinjtë e drejtësisë së “re”. Tashmë çështja e PD-së enkas është kthyer edhe një herë në Gjykatën e Shkallës së Parë për rishqyrtim. Një gjetje malinje e pushtetit që kërkon që jo vetëm në zgjedhjet lokale, por edhe ato të pëgjithshme çështja ende të mos ketë marrë udhë dhe formën e prerë. Është mëse e qartë se zvarritja do të vijojë pafund. Në Fillim nga Gjykata e Shkallës së Parë dhe më pas Gjykata e Apelit, duke paralajmëruar se vula dhe logo e PD-së ende do mbahet peng në duart e ‘Sulltanit’, me zyrë pranë Bulevardit Dëshmorët e Kombit dhe çdo Padidashu dhe “Sanije” tjetër që mund të vijë diku pranë Rrugës së Elbasanit.
