Një 20-vjeçar ka arritur ti arratiset efektivëve të Kukësit pas një ndjekje policore. Flori Lisaj akuzohet se ishte nën drejtimin e një kamioni ku u gjetën 18 refugjatë sirianë.
I riu u shpall në kërkim për veprat penale “Ndihma për kalim të paligjshëm të kufijve” dhe “Mosbindja ndaj urdhrit të punonjësit të policisë së rendit publik”.
Aksioni
Burime zyrtare nga policia lokale bënë me dije se, në orët e para të mëngjesit, shërbimet policore të Njësisë për Sigurinë e autostradës ‘Milot-Morinë’, në aksin rrugor ‘Tuneli-Morinë’, i kanë bërë shenjë ndalimi automjetit tip fugon, të marrë me qira nga Flori Lisaj, me qëllim kryerjen e kontrollit.
Ky i fundit. nuk i është bindur urdhrit për të ndaluar, por është larguar me shpejtësi, ka braktisur automjetin dhe duke përfituar nga kushtet e errësirës, ka mundur të largohet.
Gjatë kontrollit në këtë automjet, efektivët kanë konstatuar 18 emigrantë nga Siria. Sipas bluve Flori Lisaj po i transportonte kundrejt pagesës, në drejtim të Morinës, me qëllim kalimin e paligjshëm të kufirit.
