Për kandidatin e Partisë Demokratike për bashkinë e Tiranës në zgjedhjet lokale të 14 Majit, Belind Këlliçi, vendimi i Gjykatës së Apelit për t’ia lënë vulën e PD, Enkelejd Alibeajt duke zhbërë vendimin e 25 marsit nga Agron Zhukri, tregon që Edi Rama dhe Erion Veliaj kanë frikë nga zgjedhjet.
“Sot u dëshmua që Edi Rama dhe Erion Veliaj po lëvizin çdo gur, çdo instrument që kanë në dorë, për të mos lejuar zgjedhje të lira dhe garë të ndershme. Ata kanë frikë nga ju, nga vota e lire”, shkruan Këlliçi në rrjetet sociale në reagimin e parë të tij pas vendimit në Apel.
Sipas tij, kryebashkiaku i Tiranës dhe Kryeministri dëshpërimisht lëvizën çdo gur dhe goditën rëndë pluralizmin me një akt të shëmtuar.
“Vendimi i sotëm tregon se pala tjetër është e dëshpëruar përderisa i duhet që të përdorë marifete të pista për të manipuluar zgjedhjet. Sot u dha një goditje ndaj pluralizmit. Ata kanë frikë nga vullneti i qytetarëve, sepse Veliaj ka lënë pas dore banorët e Tiranës. Kudo që shkoj në qytetin tim, njerëzit janë të bindur se ka ardhur koha për ndryshim”, shprehet ai.
Më tej, Këlliçi mban të karikuar mbështetësit e Partisë Demokratike por edhe qytetarët që sipas tij duan ndryshimin në 14 Maj, duke thënë se asgjë nuk do t’i ndalë për të kthyer Tiranën në demokraci dhe te qytetarët.
“E dënoj me forcë këtë akt të shëmtuar. Gjithashtu garantoj demokratët dhe qytetarët që kjo pengesë e re nuk do të na ndalojë dot në betejën tonë për votën, për lirinë e zgjedhjes, për kthimin e Bashkisë së Tiranës në shinat e ligjshmërisë dhe në funksion të interesit publik.
Nuk ka pushtet, regjim, nuk ka dhunë e para, që të mund të ndalë vullnetin e qytetarëve dhe banorëve të Tiranës, për ndryshim.
Një forcë politike nuk e bën vula. Atë e bën fryma, shpirti dhe njerëzit. Prandaj unë sot jam më i motivuar se kurrë, bashkë me ju më i fortë dhe i vendosur, për t’ia rikthyer Tiranën qytetarëve të saj”, nënvizon Këlliçi.
