Një sasi prej 500 gramë eksploziv, e montuar në një pajisje me telekomandë, për t’u shpërthyer në distancë, është sekuestruar në Vlorë.
Në pranga është vënë një 23-vjeçar, në banesën e të cilit u gjet lënda shpëthyese. Në banesë janë sekuestruar po ashtu 2 armë zjarri, 1 armë gjahu, municion luftarak, lëndë narkotike dhe veshje si të Policisë.
D.S., 23 vjeç, i cili dyshohet të jetë pjesë e një grupi kriminal që po përgatitej për një krim të rëndë, akuzohet për veprat penale “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e lëndëve narkotike”, “Prodhimi dhe mbajtja pa leje e armëve të gjuetisë” dhe “Mbajtja pa të drejtë e uniformës”.
“Gjatë kontrollit të ushtruar në banesën e tij, në lagjen ‘Bashkimi’, shërbimet e Policisë gjetën dhe sekuestruan në cilësinë e provës materiale: 500 gramë eksploziv i montuar në një pajisje me telekomandë, për t’u shpërthyer në distancë, 1 armë zjarri automatik, 1 armë zjarri pistoletë me silenciator, 1 armë gjahu, 38 fishekë luftarakë për pistoletën dhe automatikun, 2 uniforma policie, një sasi lënde e dyshuar narkotike kanabis, 2 aparate celulare dhe 1 automjet tip ‘Volkswagen’”, njoftoi policia.
“Për shkak të sekretit hetimor, duke qenë se ngjarja është në hetim, nuk jepen detaje të tjera në lidhje me motivet dhe objektivin e synuar. Vijon puna hetimore, nën drejtimin e Prokurorisë, për identifikimin e shtetasve të tjerë që do të bashkëpunonin me shtetasin D. S. dhe për dokumentimin e plotë të këtij rasti”, mbyllet njoftimi i bluve.