Masakra në Paskuqan e Kamës ku Dan Hutra vrau dy gra (Mevlude Hysa dhe Hasime Dafku) dhe plagosi ish-bashkëshorten Elena Hysa dhe nënën e saj Kujtime Hysa, për të vrarë më pas edhe Etleva Kurtin ka “ngritur në këmbë” këtë të premte edhe Komisionin e Ligjeve.
Kryetarja e këtij komisioni, Klotilda Bushka, në funksion të ushtrimit të kompetencës monitoruese të Komisionit për zbatimin e legjislacionit dhe garantimin e respektimit të të drejtave të njeriut, u është drejtuar disa institucioneve publike, duke iu kërkuar informacionet përkatëse me qëllim verifikimin paraprak të situatës.
Kërkesa i është drejtuar Inspektorit të Lartë të Drejtësisë, me qëllim marrjen e informacionit mbi masat e marra për verifikimin e përgjegjësive të mundshme disiplinore të magjistratëve në prokurori e gjykata, ku janë shqyrtuar çështje ndaj 40-vjeçarit, i cili ishte lënë i lirë më 16 shkurt pavarësisht një vendimi të Apelit për të mbajtur në fuqi masën” arrest me burg” për të.
Gjithashtu, Ligjet kërkojnë informacion nga Ministria e Brendshme, Ministria e Drejtësisë, Drejtoria e Përgjithshme e Policisë së Shtetit dhe Drejtoria e Përgjithshme e Burgjeve është kërkuar informacion mbi zbatimin e ligjit nr. 62/2022 “Për Regjistrin Kombëtar të të Dënuarve për Krime Seksuale”.
Këshillit të Lartë Gjyqësor dhe Ministrisē së Drejtësisē i kërkohet informacion mbi zbatimin e detyrimeve për krijimin e bazës së të dhënave mbi vendimet gjyqësore për raste të dhunës në familje dhe asaj me bazë gjinore, sipas përcaktimeve të Ligjit nr. 9669/2018 “Për masat ndaj dhunës në marrëdhëniet familjare”, të ndryshuar.
Ndërkohë, bashkive Tiranë e Kamëz i kërkohet informacion nëse ka referim në mekanizmat e koordinuar te referimit të rasteve të dhunës në familje sipas detyrimeve ligjore per autorin e krimeve në fjalë dhe masat e marra, nëse ka.
