Zico përfitoi nga një intervistë për La Gazzetta dello Sport, të publikuar të premten, për t’u deklaruar shumë favorizues ndaj Carlo Ancelottit, aktualisht në pankinën e Real Madridit, për të marrë drejtimin e kombëtares së Brazilit nga sezoni i ardhshëm.
I kontaktuar nga e përditshmja sportive italiane, me rastin e ditëlindjes së tij të 70-të, e cila do të festohet me bujë në Rio de Zhaneiro këtë të premte, njeriu i mbiquajtur “Pele i bardhë” ishte shumë entuziast me idenë për të parë teknikun italian në krye të Seleçaos, që sot menaxhohet nga i përkohshëm Ramon Menezes.
“Carlo Ancelotti do të ishte ideal, sepse ai respektohet nga të gjithë, madje edhe kundërshtarët e ekipit të tij,- shpjegoi Zico. – Ai është trajneri numër 1 në botë, e njeh futbollin si askush tjetër dhe e ka kuptuar që lojtarët janë më të rëndësishëm se modulet e lojës. Me të të gjithë lojtarët shprehen në mënyrën më të mirë të tyre dhe për më tepër në Madrid ai e kuptoi shpejt si të vlerësojmë të rinjtë tanë Vinicius dhe Rodrygo, kampionët e së ardhmes. Ancelotti nuk ka ardhur kurrë në Rio? Epo, jam gati ta mirëpres dhe ta bëj të zbulojë të gjithë qytetin, që të përshtatet shpejt!”
Carlo Ancelotti është nën kontratë me Real Madridin deri në vitin 2024. A do të dëgjojë CBF, federata braziliane këshillën e Zico (dhe lavdive të tjera të dikurshme të futbollit brazilian, si së fundmi Kaka) për ta bërë ish-trajnerin e PSG-së trajnerin e parë të huaj në historinë e Seleçaos?…