Trupa e gjyqtarëve të Gjykatës së Apelit të Tiranës prej më shumë se dy orësh është tërhequr për të marrë vendimin final në lidhje me “Vulën” dhe logon e Partisë Demokratike.
Si palë në këtë proces, përfaqësuesi ligjor i grupimit të Enkelekd Alibeaj ka kërkuar pushimin e vendimit të Shkallës së Parë të gjyqtarit Agron Zhukri, ose kthimin e çështjes sërish në Shkallën e Parë por me një trupë të re gjyqtarësh.
Ndërkohë, përfaqësuesi ligjor i Partisë Demokratike të drejtuar nga Seli Berisha, Ivi Kaso deklaroi se pala që ka paraqitur ankimimim, nuk legjitimohet për të bërë ankim dhe kërkoi rrëzimin e ankimimit.
Të dyja palët pjesëmarrëse në seancën gjyqësore janë duke e pritur vendimin të ndara në oborrin e Apelit, ndërsa me ankth verdikti po pritet në selinë blu nga mbështetësit e Partisë Demokratike.
Rreth orës 18:45 në ambientet e selisë blu ka mbërritur edhe kryedemokrati Sali Berisha, i cili mesa duket do ta mësojë nga aty vendimin e gjykatës, që do të përcaktojë nëse do të jetë ai udhëheqësi legjitim i PD në zgjedhjet lokale të 14 majit, ndërkohë që më 7 mars KQZ do të vendosë se cilin nga dy grupet do të regjistrojë në proces.
Kujtojmë se sot në mbyllje të protestës së opozitës para Kryeministrisë, duke ngjitur shkallët e selisë blu, Berisha u pyet nga gazetarët nëse do lirojë selinë blu nëse Gjykata ai jep “vulën” Enkelejd Alibeaj.
“Janë misionarë të jashtëzakonshëm. Nuk bëj asnjë koment për gjykatën. Për ne, armiku është Rama. Mos i ngatërroni gjërat. Ky është revolucion me votë. Asnjë koment nuk kam përderisa gjykata nuk ka vendosur. Në protestë ishim për Edi Ramën, për ne armik numër një është Edi Rama. Ju përgjigjem unë për revolucionin. Datën e protestës do e vendosim shumë shpejt. Gjyqin nuk dua ta komentoj“, u përgjigj Berisha teksa hyri në zyrën e tij në PD.
