Gjatë fjalës së mbajtur në podiumin e protestës para kryeministrisë, kryetari i PD-së Sali Berisha akuzoi se kryeministri Edi Rama ka qëllim të përjashtojë Partinë Demokratike nga zgjedhjet e ardhshme lokale.
Por, Berisha tha se kjo nuk do të arrihet, ndërsa një mesazh e dha për kundërshtarin e tij politik.
“Sot, pasi asgjësoi PS-në, i hoqi të drejtat, votën dhe çdo gjë. E uzurpoi me sektin antishqiptar të Rilindjes, ai kërkon të asgjësojë PD-në. Mendon dhe beson se do na përjashtojë nga zgjedhjet. Edi Rama, ne do të përjashtojmë nga Shqipëria! Ne jemi këtu sa është toka. Revolucioni ka misionin e madh të demokracisë, lirisë dhe shpëtimit të shqiptarëve”, theksoi Berisha.
Kryetari i PD-së, Sali Berisha u shpreh nga foltorja e protestës se “jemi të vendosur t’i shkurtojmë orët dhe ditët, muajt, kësaj qeverie antishqiptare”.
“Edi Rama është armik i qenies suaj, është plaçkitësi më i madh në historinë e vendit, është armik i miqve tanë në SHBA dhe Europë”, iu drejtua ai-protestuesve.
Sipas tij, “qëllimi i këtij revolucioni është përmbysja e monizmit të bazuar në krimin, drogën, në vjedhjen dhe plaçkitjen”.
Apel për tu bashkuar me “revolucionin”, ai u bëri qytetarëve, veçanërisht të rinjve, por edhe punonjësve të administratës.
Shfrytëzoj rastin t’i bëj thirrje çdo të riu: bashkohuni me këtë revolucion. Revolucionet i bëjnë të rinjtë, idealet e të rinjve, guximi i të rinjve, i bën ata të pathyeshëm para asgjëje. Luftoni për veten, për të ardhmen tuaj, për vendin tuaj”, tha Berisha.
“Një thirrje u bëj të gjithë pubonjësve të administratës shtetërore, mos harroni se në ligj dhe moral, ju nuk jeni badigardë as shërbëtorë të një organizate kriminale që kryesohet nga Edi Rama, por jeni shërbëtorë të qytetarëve. Sot ju përjetoni një terror dixhital dhe të gjithanshëm. Bashkohuni me ne në këtë revolucion të përmbysim këtë organizatë kriminale. Të shpëtojmë Shqipërinë prej saj”, deklaroi.
Më tej shtoi se “revolucioni ynë ka për qëllim madhor t’i japë goditje përfundimtare varfërisë”. “Ne, tha ai, e konsiderojmë varfërinë nënën e të këqijave që ka sjellë Edi Rama”.
“Varfëria luftohet duke dyfishuar rrogat, pensionet, duke përgjysmuar taksat, duke përgjysmuar çmimin e energjisë. Varfëria luftohet duke investuar në infrastrukturë për ju, shkolla, spitale, duke krijuar pra kushtet që ju meritoni. Varfëria luftohet duke luftuar krimin e organizuar, korrupsionin me zero tolerancë. Ne do dalim fitimtarë nga kjo betejë”, u shpreh Berisha.
Fjalën e tij e mbylli me bindjen e triumfit “në këtë betejë si misionarë të revolucionit demokratik”.
“Koha është e misionarëve, e atyre djemve dhe vajzave, të rinjve dhe të rejave, burrave dhe grave që qëndrojnë në këmbë mbi kohën, të pamposhtur, drejt të ardhmes. Historinë e kemi pasur të mbushur me pushtime, dhimbje dhe vuajtje, por nuk jemi nënshtruar kurrë. Kemi triumfuar në të gjitha beteja tona për liri. Do triumfojmë edhe në këtë betejë si misionarë të revolucionit demokratik. Kjo kërkon të bashkohemi, të bashkohemi, të bashkohemi! Historia na mëson se sa herë që shqiptarët janë bashkuar, kanë bërë mrekullitë e tyre. Le të bëjmë edhe ne mrekullinë tonë, të shndërrojmë vitin 2023 në vitin e mrekullisë shqiptare. Rrofshi ju, rroftë Shqipëria. Zoti ju bekoftë ju, flamurin dhe kombin tonë”, tha ai.
Me mbylljen e fjalës së Berishës, nisi dhe shpërndarja e protestuesve.
