Kryeministri Edi Rama u shfaq i nervozuar madje shpesh herë akuzonte më shumë opozitën në sallën e Kuvendit ku foli për skandalin McGonigal.
Gjatë fjalës së tij, Rama u tall me akt-akuzën amerikane, ku përmendet 14 herë emri i tij. Si zakonisht, Rama përdori strategjinë e sulmit ndaj opozitës dhe minimizimit të skandalit duke thënë se nuk ka asnjë komprometim që i përmendet emri 14 herë në dosje.
Rama i pranon si fakte të gjitha herët kur emri i tij përmendet në aktakuzë, si për rastet kur takohet me ish-zyrtarin e FBI-së ashtu edhe me personat A dhe B në aktakuzë, por mohon që në ndonjë rast të ketë akuza apo “krime të kryera.”
“McGonigal mori informacion nga zyra e kryeministrit për lobimin rus. Unë, apo zyra ime, nuk kishim asgjë nga ato që kishin dalë në media. Sepse po t’i kishim, çfarë do të mbronin? Lulin apo tutorin e Lulit? Po të kisha pasur çfarëdolloj informacioni për këtë fakt të tmerrshëm do t’ia kisha përcjellë kujtdo që do të mundja, nga organizatat partnere. FBI-së të parës fare. Problem për vendin do të ishte e kundërta dhe të mos tregoja. Unë nuk e di sinqerisht ku do të donit të dilnit me këtë? Rusët i kam shpikur unë? CIA në raportimin e saj e ka publikuar se PD se bashku me një parti në Mal të Zi, Bosnjë, apo Maqedoni financohen nga para ruse për të destabilizuar. Kjo është ajo që doli nga ne sipas jush? Ai rusi vetë ka deklaruar se ka ndihmuar PD-në.Aktakuza nuk thotë asgjë as për mua as për qeverinë! As për personin tjetër në fjalë unë skam lidhje me atë”, tha Rama.
