Deputeti i Partisë Demokratike, Oerd Bylykbashi, ka qenë i ftuar në emisionin “Të Paekspozuarit” në MCN TV, ku foli për mocionin me debat të zhvilluar ditën e sotme në Parlament, për çështjen “McGonigal”.
Bylykbashi tha se kryeministri shfaqi në fjalën e tij “sikletet e veta”, ndërkohë që ndalimin e opozitës për zhvillimin e interpelancës dhe komisionit hetimor, e konsideroi mospërfillje të Ramës ndaj Parlamentit.
“Është kërkuar interpelancë, mocion me debat, komision hetimor. Të gjitha për cështjen McGonigal. Çfarë bëri Rama? Detyroi Lindita Nikollën ti grupojë në një Çështje, që Rama të fliste vetëm një herë. Ndryshe është interpelanca, ndryshe debati.
Çfarë kemi dëgjuar deri tani? Ai tha nuk dua dhe nuk e ngre komisionin hetimor, që është detyrim kushtetues. Sot tha edhe një gjë tjetër, tani e tutje as në Parlament dhe as jashtë nuk bëj debat me ju.
Rama foli dhe iku, tha nuk dua t’ja di për këtë Parlament. Nëse do të rrinte aty, duhet të jepte përgjigje për një problem që e përcëllon atë.
Ai mendon se ka të gjithë pushtetin. Kjo e ka çuar të mendojë se mund të përdorë edhe FBI-në për luftën e brendshme politike.
Ai ka një siklet të madh. Ai foli dhe preku padinë, aty tregoi se ku kishte sikletet e tij, pikat e tij të dobëta”, deklaroi Bylykbashi.
