Pasi Balla nxori në Kuvend audiopëgjimin e publikuar mbrëmjen e djeshme për 21 Janarin, deputeti i PD-së, Ervin Salianji akuzoi mazhorancën se janë të korruptuar dhe se janë tallur me gjakun e viktimave të asaj ngjarjeje të rëndë.
“Unë jam opozitë dhe s’më blen dot njeri dhe do jem gjithnjë opozitë. Keni vite që ngrini akuza. Keni gjithë pushtetin dhe s’lëshoni asnjë. Keni gjithë këto vite që akuzoni për 21 janarin dhe talleni me gjakun e atyre viktimave të shkretë“- tha Salianji.
Më tej ai komentoi edhe fjalimin e Ramës dhe e cilësoi si hartim të dobët dhe të përgatitur në formë të tillë që vetëm të lexonte dhe mos të dilte nga fjalët që i kishin shkruar.
“Kryeministri foli për ujëra të zeza, nuk tha dhe manipuloi akt akuzën. Por për herë të parë, sterronte dhe ishte strehuar në egoizmin e vetë dhe nuk doli nga asnjë fjalë që i kishin shkruar. Pse nuk e thotë kryeministri që pas takimit A dhe B shkuan në SHBA dhe korruptuan shefin e FBI. Hartimi i kryeministrit sot ishte shumë i dobët. Nuk është folur kurrë në këto përmasa, nga SHBA, MB Itali etj, më shumë sesa sot për korrupsionin dhe gjithë elementët e tjerë që e kanë sterruar këtë vend.”- tha Salianji.
