Gafat e policisë në vendin tonë po bëhen të shpeshta. Policia e Durrësit ka dalë me nje njoftim të dytë sa i takon aksidentit të ndodhur sot.
Në njoftimin e parë policia njoftoi se një makinë kishte përplasur për vdekje një këmbësor.
Policia sqaron se informacioni paraprak është një laspus dhe se shtetasi Y.H nuk ka vdekur por ndodhet në gjendje të rëndë për jeten.
Ndërkohë shtetasja A. B., drejtuesja e automjetit që shkaktoi aksidentin, është shoqëruar në ambientet e Policisë, për veprime të mëtejshme procedurale.
“Në lidhje me lajmin paraprak të dhënë paraditen e sotme, për një aksident rrugor, sipas të cilit, nga kontakti i menjëhershëm me vendngjarjen dhe nga konstatimet paraprake të shërbimeve mjekësore, i dëmtuari, shtetasi Y. H. (këmbësor) kishte humbur jetën, ju bëjmë me dije se: Informacioni paraprak është lapsus, pasi shtetasi Y. H. nuk ka humbur jetën, por është në gjendje të rëndë shëndetësore.
Ndërhyrja e menjëhershëm e shërbimeve mjekësore dhe asistenca e specializuar e ofruar nga ekipi mjekësor, ndaj këtij shtetasi, pas transportimit në spital, kanë bërë të mundur shpëtimin e jetës së shtetasit Y. H., i cili aktualisht ndodhet në gjendje të rëndë shëndetësore.
Shtetasi Y. H. ndodhet aktualisht në kujdesin e mjekëve, ndërsa shtetasja A. B., drejtuesja e automjetit që shkaktoi aksidentin, është shoqëruar në ambientet e Policisë, për veprime të mëtejshme procedural”, thuhet në njoftimin e ri të policisë.
Jo më larg se 2 ditë më para në në Tiranë ndodhi një aksident masiv i cili mund të kishte pasoja tragjike.
Autobusi i linjës së unazës së vogël mori përpara me dhjetëra automjete, nga fuoristrada te makinat e vogla, duke shkaktuar panik dhe lënë dhjetëra persona të plagosur.
Fillimisht Policia e Tiranës ka dalë me një njoftim zyrtar lidhur me aksidentin teksa bënë me dije se ishin plagosur vetëm 3 persona, ndërsa me të mbërritur në vendin e ngjarjes mediat raportuan se dhjetëra qytetarë ishin lënduar dhe transportuar në spital me disa ambulanca.
“Më datë 27.02.2023, rreth orës 11:35, në vendin e quajtur Ura e Tajvanit, një autobus i linjës së Unazës është përplasur me disa automjete. Si pasojë janë dëmtuar 3 shtetas të cilët ndodhen nën kujdesin e mjekëve. Në vendngjarje ndodhen shërbimet e ambulancës me stafin mjekësor dhe shërbimet e Policisë”, njoftoi fillimisht policia.
Më pas policia përgenjështroi veten teksa u shpreh se kishte më shumë se tre të plagosur.
“Në vijim të informacionit paraprak të dhënë pak minuta më parë, ku rreth orës 11:35, në vendin e quajtur “Ura e Tajvanit”, një autobus i linjës së Unazës është përplasur me disa automjete, ju sqarojmë se:
Si pasojë janë dëmtuar shtetasit: A. Xh., 63 vjeç, (drejtuesi i autobusit), M. S., 35 vjeçe; G. P., 27 vjeç dhe V. P., 27 vjeç; O. G., 52 vjeç dhe J. C., 31 vjeçe, D. N., 27 vjeç, K. A., dhe E. H., të cilët ndodhen nën kujdesin e mjekëve”, njoftoi policia.
