Një aksident me të paktën 38 të vdekur ndodhi mbrëmjen e djeshme në Greqinë veriore, ku një tren udhëtarësh u përplas me një tren mallrash. Në trenin e udhëtarëve ishin 350 veta, ndërsa raportohet për mbi 250 persona të plagosur.
Ministria e Jashtme ka konfirmuar se deri më tani, nuk ka informacione për shqiptarë të vdekur apo të plagosur.
“Ministrja është në komunikim të vazhdueshëm me ambasadën tonë në Athinë dhe Konsullatën e Përgjithshme në Selanik lidhur me aksidentin. Deri më tani nuk ka ende informacion për shtetas shqiptarë në radhët e viktimave apo të të plagosurve, ndërkohë që përfaqësues të Konsullatës në Selanik janë në vendngjarje”, thuhet në një njoftim të zyrës së shtypit pranë Ministrisë së Jashtme.
