Një tjetër jetë e humbur i shtohet bilancit të aksidentit tragjik që ndodhi mbrëmjen e 22 shkurtit në aksin rrugor Ferizaj-Shtimë, në Kosovë.
Mediat vendase raportojnë se 27-vjeçarja shtatzënë që mori plagë të rënda nga përplasja e tre automjeteve me njëra-tjetrën, ka ndërruar jetë këtë të martë në QKUK.
E reja nuk ka arritur që t’i përballojë plagët e marra dhe si pasojë ka ndërruar jetë në spital. Vdekjen e saj e ka konstatuar mjeku në QKUK, ndërsa me urdhër të prokurorit, trupi i pajetë i viktimës është dërguar në Institutin e Mjekësisë Ligjore për obduksion.
Në aksidentin tragjik që ndodhi në hyrje të Shtimes humbën jetën katër persona, ndërsa të lënduar mbetën gruaja shtatzënë dhe bashkëshorti i saj.
Sakaq, viktimat ishin katër të rinjtë Arlind Isufaj, 21-vjeçar, Mergim Behluli, 23-vjeçar, Armend Muhadini, 39-vjeçar dhe Arsim Isufaj, ndërsa mbetën të lënduar rëndë një çift burrë e grua.
Aksidenti dyshohet të ketë ndodhur pasi drejtuesi i automjeti tip “BMW” (me të cilën po udhëtonin katër viktimat) humbi kontrollin mbi timon dhe ka goditur dy mjetet që vinin përballë.
