Tirana është një kryeqytet me 1 milionë banorë që si alternativë të vetme të transportit publik ka 15 linja të transportit urban, të cilat janë shndërruar në një nga “hallet” në jetën e përditshme të qytetarëve, që ju duhet t’i përdorin për të shkuar në punë, shkollë, apo gjetkë.
Pavarësisht premtimeve në dy fushata elektorale radhazi për të rivitalizuar sistemin e transportit publik dhe kushte më të mira udhëtimi për qytetarët, duke nisur nga shpejtësia me të cilën do të ofrohej shërbimi, Erion Veliaj jo vetëm që ka dështuar por me kontratat klienteliste e ka shndërruar në skandaloz këtë sektor.
Linja urbane në Tiranë mbetet një nga fenomenet më shqetësues, pasi cilësia e shërbimit lë për të dëshiruar. Banorët e kryeqytetit në vazhdimësi janë shprehur se ka shumë vonesa në stacione, ka fluks udhëtarësh, mungon ajri i kondicionuar, dhe se shpeshherë shoferët dhe fatorinot i shndërrojnë autobusët në “arena boksi” ku zbrazin nervat dhe grushte mbi qytetarët.
Sikur të mos mjaftonin kushtet e këqija të transportit publik, autobusët e linjave urbane në dhjetëra raste kanë pësuar defekte ose kanë shkaktuar aksidente të rënda që kanë vendosur në rrezik jetën e udhëtarëve.
I tillë ishte ai i djeshmi në zonën e “Shallvareve” ku autobusi i linjës së “Unazës” në pronësi të biznesmenit Nadir Çausholli mori përpara 10 makina që kishin ndaluar në semafor, duke plagosur 9 persona dhe duke rrezikuar jetën e kalimtarëve.
Por, edhe pse transporti publik në kryeqytet është tema kryesore e diskutimit për sigurinë dhe kushtet që iu ofrohen qytetarëve, aksidenti masiv i të hënës nuk ka ndikuar aspak te kërkesa për të marrë një abone, pasi qytetarëve iu mungojnë alternativat për të lëvizur me kosto të lirë në kryeqytet.
Siç shihet edhe në disa pamje të shpërndara nga LSA, radhët për abone janë të frikshme.
Kjo edhe prej faktit se Bashkia Tiranë ka përcaktuar se vetëm disa kioska kanë të drejtën që t’i shesin ato. Sakaq, bie në sy se mosha e atyre që marrin abone janë kryesisht 18-30 vjeç, pra studentë e të rinj që përdorin urbanët për të lëvizur në drejtim të universiteteve apo për të shkuar në punë.
