Dhuna kafshërore midis të rinjve, kryesisht vajza, në shkollat e Tiranës por edhe në rrugë ku shpesh arsye për konflikt paraqiten “lidhjet e dashurisë”, është kthyer në një fenomen shqetësues për shoqërinë shqiptare.
Vetëm një javë më parë një video e filmuar pranë shkollës 9-vjeçare “Kongresi i Manastirit”, ku një grup vajzash të klasës së 7-të dhunonin barbarisht një bashkëmoshatare u bë virale, ndërsa u pasua me një tjetër video pranë një gjimnazi ku po ashtu një vajzë goditej pa mëshirë në kokë me shkelma nga një tjetër adoleshente.
Grushtet, shkulja e flokëve, shkelmat dhe gjuha banale me të cilën adoleshentët i adresohen njëri-tjetrit në shkollë, rrugë, parqe apo lagje, duket se ka marrë përmasa aq masive sa video me përmbajtje të tilla (të rëndë) po publikohen çdo ditë.
Së fundmi JOQ ka publikuar një video, ku shihet një tjetër skenë dhune me protagoniste dy vajza minorene, të cilat përleshen me njëra-tjetrën me grushte e kapen prej flokësh në një prej rrugëve kryesore të zonës së Bathores.
Sipas denoncimit, vajzat janë në klasë të 6 të shkollës “Ibrahim Basha” në Bathore dhe janë konfliktuar për të treguar se kush është më e fortë nga ato, ndërkohë që bashkëmoshatarët e tyre ndjekin të pashqetësuar skenën.
Për raste të tilla dhune, drejtoresha e shkollës 9-vjeçare “Kongresi i Manastirit”, Rudina Maksuti shprehu dje shqetësimin në emisionin “Open”, duke thënë se adoleshentët po ndjekin modele të gabuara, pasi ndikohen nga emisione televizive që prodhojnë banalitet dhe dhunë, sapo dalin nga dyert e institucioneve arsimore.
Ajo përmendi formate televizive si “Për’puthen” apo Big Brother dhe rrjete sociale si Tik Tok, që sipas saj motivojnë shtimin e rasteve të dhunës te adoleshentët dhe gjuhës banale që ata përdorin.
Ajo nuk i rezervoi kritikat as për prindërit që i pajisin adoleshentët me smart-phone të fundit si për të treguar standartin e lartë të jetesës, por edhe për faktin se ngelizhojnë mbledhjet që u kërkohen nga mësuesit duke mos u interesuar për fëmijët e tyre.
“Sado ne të edukojmë në shkollë, përtej dyerve të shkollës nuk gjen librin hapur por gjen Big Brother, nuk gjen detyrën por gjen Për’puthen, gjen Tik Tok-un. Dhe gjithë ajo edukata rrëzohet. Prindërit janë shumë krenarë kur u blejën ato telefonat që kush e kush t’ja blejë më të shtrenjtë, sepse janë fëmijë dhe mendojnë se plotësimi i kushteve janë modelet firmato. Por nuk e kontrollojmë. Arrin deri aty sa kur thërrasim prindër, thonë që të ‘lë punën unë që vij atje’. Prindi i thotë, po të gjuaji, ti mos rri po duart nuk i ka të thara. Problemi është i gjithë shoqëria. Nga familja që është A e punës, është shkolla, është shoqëria. Ka komunitete të ndryshme, ke familje me probleme, babai rreh nënën, tek Big Brotheri ngrihet model një që bullizon, ky është modeli pra”, nënvizon Maksuti.
